პარტია რეფორმერის გენერალური მდივანი, განათლების ექსპერტი ანი ჯაფარიძე იმ რისკებზე და საფრთხეებზე აკეთებს განცხადებას, რაც არსებობს ბავშვებისთვის კიბერსივრცეში, რომელიც არ კონტროლდება.

"იმისთვის, რომ კიბერსივრციდან მომდინარე საფრთხეებისგან დავიცვათ ჩვენი შვილები, მთავარია მეტი კომუნიკაცია ბავშებთან. ამას გარდა, არსებობს კომპიუტერის კონტროლის უამრავი იაფფასიანი ან სრულიად უფასო პროგრამული უზრუნველყოფა (Parental controls). საკმარისია დაინტერესდეთ და Google-ის მარტივი ძიებით უამრავ ასეთ პროგრამას იხილავთ რეიტინგებით და მარტივად გასაგები აღწერილობით. ძებნაში მიუთითეთ Parental controls ან Child control, internet safety software.

  • გამოვიყენოთ ოპერაციული სისტემის შეზღუდვები, როგორც კომპიუტერზე, ისე სმარტფონებზე (მაგ. Apple-ის მოწყობილობებზე ScreenTime). ეს ინფორმაციაც თავისუფლად მოძიებადია როგორც სტატიების, ისე ვიდეო გაკვეთილების სახით თითქმის ყველა ენაზე.
  • უსაფრთხოების დამატებითი არსენალისთვის შევიძინოთ WiFi მოწყობილობა Parental Control ფუნქციებით, რომელიც ბაზარზე მრავლდაა. არ დავჯერდეთ მხოლოდ თქვენი ინტერნეტ პროვაიდერის მიერ მოწოდებულ აპარატურას.
  • ბავშვის კომპიუტერი უმჯობესია იყოს მისაღებ ოთახში ან საზიარო სივრცეში, სადაც ბავშვს არ ექნება კომპიუტერის სხვაგვარად გამოყენების ცდუნება და თავიდანვე მიეჩვევა ტრანსფარენტულობას, ამგვარი დეტალები მნიშვნელოვან როლს ასრულებენ ადამიანის ფსიქოტიპის ფორმირებაში და მათ შემდგომ სამუშაო ეთიკაზეც კი აისახება. დააწესეთ ლიმიტი კომპიუტერისა და სმარტფონის გამოყენებაზე

კომპიუტერი და ინტერნეტი დღეს თითქმის ყველას აქვს, მაგრამ განუსაზღვრელი შესაძლებლობების ფანჯარა ყველასთვის იგივე დატვირთვას არ ატარებს. სამწუხაროდ ხშირად, ნაცვლად დისტანციური განათლების თუ ბიზნესის კეთებისა და დასაქმების გრანდიოზული პერსპექტივები ნაცვლდება აზარტული თამაშებით, პორნოგრაფიით და ინტერნეტის სრულიად უსარგებლო გამოყენებით. ნაცვლად იმისა, რომ იმ უამრავი საფრთხეების გამო, რომლებიც დღეს არის და იქნება, უარი ვთქვათ ტექნოლოგიებზე და მათი დემონიზება მოვახდინოთ, უმჯობესია გამოვიყენოთ მათი პოზიტიური მხარე. დემონიზებით, ხისტი აკრძალვებით და ტაბუებით გარდა იმისა, რომ ფსიქოლოგიურად უფრო მიმზიდველს გავხდით მანკიერებებს, საკუთარ შვილებს უარს ვათქმევინებთ მართლაც უნიკალურ შესაძლებლობებზე, რომელთა გამოუყენებლობით ან არასწორი გამოყენებით კონკურენტულ მომავალ თაობაში პოზიციებს დავაკარგინებთ" — აცხადებს ანი ჯაფარიძე.

ანი ჯაფარიძის განცხადებით, მშობლებს გაცილებით მეტი პასუხისმგებლობა ეკისრებათ, ვიდრე შვილებისთვის უსაფრთხო და უზრუნველი გარემოს შექმნაა.

"სწორედ აქ არის ჩვენი მთავარი როლი. ისევე როგორც სხვა დანარჩენ ყოფით საკითხებში, აქაც მოგვეთხოვება ვიყოთ მაგალითი, როლური მოდელი შვილებისთვის, ბავშვებს ტექნოლოგიების სარგებელი უნდა ვაჩვენოთ ჩვენს მაგალითზე", — ამბობს ანი ჯაფარიძე.