BBC-ს ცნობით, ახალი კორონავირუსის ოქსფორდის ვაქცინის კლინიკური კვლევების მესამე ფაზა მას შემდეგ დააპაუზეს, რაც ერთი პაციენტი ავად გახდა. პირველი და მეორე წარმატებული ფაზის შემდეგ, ვაქცინის მესამე ფაზის წარმატებულად დასწრულებაზე დიდ იმედებს ამყარებდნენ.

AstraZeneca-სა და ოქსფორდის უნივერსიტეტის ვაქცინის კვლევებს მთელი მსოფლიო ყურადღებით აკვირდება, რადგან ის განიხილება, როგორც ძლიერი პრეტენდენტი მსოფლიოში განვითარებულებს შორის.

მისი კვლევის მესამე ფაზაში ბოლო კვირების განმავლობაში 30 000 ადამიანი მონაწილეობდა ამერიკის შეერთებული შტატებიდან, დიდი ბრიტანეთიდან, ბრაზილიიდან და სამხრეთ აფრიკიდან. BBC-ს ინფორმაციით, კვლევა შეიძლება რამდენიმე წელი გაგრძელდეს. გამოცემის კორესპონდენტის ცნობით, ეს მეორე შემთხვევაა, როცა ოქსფორდის ვაქცინის წარმოება შეაჩერეს.

ჯანდაცვის მსოფლიო ორგანიზაციის განცხადებით, მსოფლიოს მასშტაბით 180-მდე ვაქცინაზე მიმდინარეობს კვლევა, თუმცა კლინიკური კვლევები ჯერ არც ერთს დაუსრულებია.

ამერიკის პრეზიდენტმა, დონალ ტრამპმა განაცხადა, რომ მას სურს ვაქცინა აშშ-ში ჩასატარებელ 3 ნოემბრის არჩევნებამდე იყოს. ტრამპის ამ განცხადებას საზოგადოებაში გარკვეული შიში მოჰყვა, რომ დაჩქარებით მიღებული ვაქცინა, შესაძლოა, უსაფრთხო არ იყოს.