დაავადებათა კონტროლის ცენტრის ხელმძღვანელის, ამირან გამყრელიძის თქმით, ბოლო სამ დღეში გურიაში დაფიქსირებული 6 შემთხვევიდან ყველა ბათუმში გადახდილ დიდ ქორწილს უკავშირდება.

"გურიაში გვაქვს 6 შემთხვევა სამი დღის განმავლობაში ოზურგეთის და ჩოხატაურის მუნიციპალიტეტებში და ექვსივე შემთხვევა დაკავშირებულია ბათუმში დიდი ქორწილთან. ღმერთმა ქნას, ბევრი ქორწილი იყოს ქვეყანაში და ბევრი ბავში დაიბადოს, მაგრამ ამ პანდემიის პერიოდში შევიკავოთ თავი დიდი თავყრილობებისგან. რა თქმა უნდა, ქორწილის შესაბამისი აღნიშვნა უნდა იყოს, მაგრამ არ შეიძლება 300 და 400 კაციანი იყოს, რომელიც ძალიან მომატებული რისკია. პანდემიის განმავლობაში გთხოვთ თავი შეიკავოთ დიდი ქორწილებისგან.", — განაცხადა ამირან გამყრელიძემ.

7 სექტემბრის მონაცემებით, საქართველოში კორონავირუსის 34 ახალი შემთხვევა გამოვლინდა, 5 ადამიანი გამოჯანმრთელდა. მონაცემები StopCov-ზე განახლდა.

ინფექციური საავადმყოფოს სამედიცინო დირექტორის, მარინა ეზუგბაიას თქმით, 34 დადასტურებული შემთხვევის განაწილება შემდეგნაირია — 6 შემთხვევა საკონდიტრო დონას კლასტერიდანაა, 15 პაციენტის წყარო დადასტურებულ შემთხვევებთან კონტაქტია, 8 პაციენტს აჭარაში მოგზაურობის ისტორია აქვს, 1 დადასტურებული შემთხვევა სამედიცინო პერსონალია, 2 კი შემოტანილი შემთხვევაა. დარჩენილ 2 პაციენტზე წყაროს დადგენისა და კონტაქტების მოძიების თვალსაზრისით ეპიდემიოლოგიური კვლევა გრძელდება.

ჯამში, საქართველოში კორონავირუსის დადასტურებულ შემთხვევათა რაოდენობა 1 684-მდე გაიზარდა, ამათგან 1 315 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 6 020, სტაციონარში მეთვალყურეობის ქვეშ კი — 299.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: