თამარ ბაჩალიაშვილის ადვოკატ მიხეილ რამიშვილის განცხადებით, გამოძიება გარკვეული პირების, მათ შორის დეა კაპანაძის ჩვენებით, თამარ ბაჩალიაშვილის თვითმკვლელობის ვერსიის გამყარებას ცდილობს. მისივე თქმით, ბაჩალიაშვილის მეგობარ დეა კაპანაძის ჩვენება ბევრ კითხვის ნიშანს აჩენს. ის პროკურატურას კაპანაძის ჩვენებით დაინტერებისკენ მოუწოდებს.

"რატომ უნდა ამყარებდე შენ ისეთ ფაქტს, რომლის ფაქტიც ბუნებაში არ არსებობს. დეა კაპანაძე ჩვენებაში ადასტურებს, რომ შინაური ადამიანის მოქმედების გარეშე, თამარის ბუნებიდან გამომდინარე, ვინმეს მისი სახლიდან გაყვანა არ შეეძლო. არსებითი მნიშვნელობა აქვს ამ შემთხვევაში, გამოთხოვილი და აღდგენილი იყოს ყველა ის სატელეფონო და კომპიუტერის ჩანაწერი, რაც წაშლილია", — განაცხადა რამიშვილმა.

ის, აგრეთვე, პროკურატურისგან დაჩქარებული ტემპით 18-22 ივლისამდე პერიოდში სატელიტიდან გადაღებულ სურათების გასაჯაროებას ითხოვს, რათა დადასტურდეს, იყო თუ არა ადგილზე ბაჩალიაშვილის ავტომანქანა.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.