ფილარმონიასთან, კლუბ დეჟავუს აფეტქების დროს დაშავებული ორი პირი სტაბილურადაა, ხოლო მესამე კლინიკიდან უკვე გამოწერეს.

ალადაშვილის კლინიკაში აღნიშნავენ, რომ 33 წლის კაცი სტაბილურადაა და ამ დრომდე მართვის სუნთქვაზე იმყოფება.

"პაციენტს აღენიშნებოდა დამწვრობა სახის, გულმკერდისა და კიდურების არეში. აღენიშნებოდა ჭრილობა მხრისა და კისრის არეში. პაციენტს ჩაუტარდა სრულყოფილი კვლევები. არ გამოვლინდა მძიმე დაზიანებები. გამოვლინდა მხოლოდ ფილტვის დაჟეჟილობა", — განაცხადეს კლინიკაში.

რაც შეეხება ხეჩინაშვილის კლინიკაში მყოფ კაცს, მას ოპერაცია ჩაუტარდა. იგი ახლა კონტაქტურია.

"პაციენტი შემოვიდა დიაგნოზებით პოლიტრავმა, გულმკერდისა და მუცლის ღრუს დახურული ტრავმა. პაციენტს, ასევე, აღენიშნებოდა ნაფლეთოვანი ჭრილობები კისრისა და მარჯვენა კიდურის მიდამოებში. პაციენტს ჩაუტარდა შესაბამისი სრულყოფილი გამოკვლევა და ჩაუტარდა ოპერაცია", — განაცხადეს კლინიკაში.

კლუბ დეჟავუში აფეთქება 4 სექტემბერს მოხდა. სავარაუდოდ, ჟანგბადის ბალონი აფეთქდა. შემთხვევის შედეგად 3 ადამიანი დაშავდა, ერთი კაცი კი დაზიანებების გამო გარდაიცვალა.

გამოძიება სისხლის სამართლის კოდექსის 240-ე მუხლის მე-2 ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც სიცოცხლის მოსპობა გამოიწვია.