ბელარუსის პრეზიდენტი, ალექსანდრ ლუკაშენკო ამტკიცებს, რომ რუსი ოპოზიციონერის, ალექსეი ნავალნის მოწამვლა ფალსიფიკაციაა და დაზვერვამ გერმანიისა და პოლონეთის საუბარი მოიპოვა. თავისი მოსაზრებები და "მტკიცებულებები" ლუკაშენკომ რუსეთის პრემიერმინისტრ, მიხაილ მიშუსტინს შეხვედრის დროს გააცნო.

როგორც ლუკაშენკო ყვება, ბელარუსულმა დაზვერვამ "გუშინ თუ გუშინწინ, მერკელის გამოსვლამდე" მოიპოვა გერმანიისა და პოლონეთის "საინტერესო საუბარი", რომლიდანაც იკვეთებოდა, რომ ნავალნი მოწამლული არაა.

"მოგცემთ ამას წასაკითხად, მოვამზადებთ და უშიშროების სამსახურში გამოვაგზავნით", — უთხრა ლუკაშენკომ მიშუსტინს.

მისივე თქმით, ფალსიფიკაციის მიზეზი არის ის, რომ "პუტინს ბელარუსის საქმეებში ცხვირის ჩაყოფის სურვილი გაუქრონ".

რუსეთის პრეზიდენტის პრესსპიკერი, დიმიტრი პესკოვი აცხადებს, რომ ლუკაშენკოს განცხადებაზე კრემლში ინფორმაციას ფლობენ, თუმცა არავითარი დამადასტურებელი ცნობა ჯერ არ უნახავთ.

გერმანიის მთავრობის განცხადებით, ალექსეი ნავალნი "ნოვიჩოკით" მოწამლეს. ეს არის ქიმიური ნივთიერება, რომელიც ნერვიულ სისტემას ანადგურებს.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. გერმანელმა ექიმებმა დაადგინეს, რომ ის მოწამლულია. 2 წლის წინ სერგეი და იულია სკრიპალები, ქალაქ სოლსბერიში იგივე ნერვო-პარალეპტიკური ნივთიერებით, ე.წ "ნოვიჩოკით" მოწამლეს.

რუსეთის საგარეო საქმეთა სამინისტროში მიაჩნიათ, რომ ნავალნის მოწამვლა ფაქტებით არ არის განმტკიცებული.