ქართულ ოცნების საარჩევნო შტაბის ხელმძღვანელის, ირაკლი კობახიძის განცხადებით, "კონკრეტული სააგიტაციო მასალა ვერ გახდება არჩევნებიდან მოხსნის საფუძველი". ასე ეხმაურება ის ოპოზიციის მოთხოვნას, პატრიოტთა ალიანსის საპარლამენტო არჩევნებიდან მოხსნის შესახებ.

"იმდენი ანტისახელმწიფოებრივი რამე აქვთ გაკეთებული, მაგალითად, თუნდაც ნაციონალურ მოძრაობას, ევროპულ საქართველოს და მათ სატელიტ პარტიებს, ეს რომ იყოს არჩევნებიდან მოხსნის საფუძველი, პირველი ბუნებრივია ისინი მოიხსნებოდნენ. სამწუხაროდ, ეს არ არის არჩევნებიდან მოხსნის საფუძველი", — განაცხადა კობახიძემ რუსთავი 2-ის ეთერში.

მისი თქმით, რაც შეეხება პოლიტიკურ შეფასებას, მათ უკვე თქვეს, რომ ეს იყო ანტისახელწიფოებრივი ქმედება და რუსული დაკვეთა.

ღია პრორუსულმა პარტიამ, პატრიოტთა ალიანსმა გააკრა საარჩევნო ბანერები, რომლებზეც აჭარის რეგიონი გამოყოფილია, როგორც ოკუპირებული ტერიტორია, აფხაზეთთან და სამხრეთ ოსეთთან ერთად. აღნიშნულს სოციალურ ქსელში კრიტიკა მოჰყვა, პატრიოტთა ალიანსს შუღლის გაღვივებაში ადანაშაულებენ. პარტიაში კი ამაში პრობლემას ვერ ხედავენ. მეტიც, პარტიის ლიდერს, ირმა ინაშვილს ჰგონია, რომ ეს "აჭარისა და ქვეყნის ერთიანობის დაცვისკენ" მიმართული ქმედებაა.

აღნიშნული ბანერებიდან ერთ-ერთი ლელოს წევრმა, ირაკლი კუპრაძემ ჩამოხსნა, დანარჩენები კი ბათუმის მუნიციპალურმა ინსპექციამ.

მოგვიანებით ალიანსის ლიდერმა, ირმა ინაშვილმა დაიწყო იმის მტკიცება, რომ მათი ბანერი "არასწორად შეფერადებულ მდგომარეობაში" გიგა ბოკერიას და მიხეილ სააკაშვილის დავალებით, მის პარტიაში მყოფმა, მოსყიდულმა პირებმა გააკრეს. ინაშვილი ამტკიცებს, რომ მათ ბანერზე აჭარა არა ოკუპირებული რეგიონების ფერებში, არამედ ყვითლად იყო გამოყოფილი და SOS ეწერა.

ამავე დღეებში პატრიოტთა ალიანსი ანტიეროვნულ ქმედებებში დაადანაშაულეს, როცა ისინი ოკუპირებულ რეგიონში ჩავიდნენ დე ფაქტო პრეზიდენტის ყოფილი თანაშემწის დახმარებით. გარდა ამისა, რუსულმა საგამოძიებო პორტალმა გაავრცელა ინფორმაცია იმის შესახებ, რომ პარტია წინასაარჩევნოდ კრემლიდან ფინანსდება.