პარლამენტის დეპუტატმა, ალექსანდრე ერქვანიამ, პარლამენტის პლენარულ სხდომაზე სიტყვით გამოსვლისას განაცხადა, რომ წინასააღდგომოდ ეკლესიებში დაწესებული შეზღუდვების გამო, ხელისუფლებამ მრევლს ბოდიში უნდა მოუხადოს. ის ფიქრობს, რომ 9 საათის განმავლობაში ტაძრის ეზოებში მრევლის პატრულის მეთვალყურეობის ქვეშ გამოკეტვა სამარცხვინო იყო.

"ბოდიში უნდა მოუხადოთ მრევლს თქვენი საქციელისთვის და საერთოდ, სირცხვილია, როცა პოლიტიკოსები წინასაარჩევნოდ მოსახლეობისგან ხმების მოსაპოვებლად ხდებიან მორწმუნეები. სამარცხვინო იყო, ვნების შვიდეულის ღვთისმსახურებებში მისული ადამიანების მიმართ ფოტო-ვიდეო გადაღების წარმოება, ზიარებასთან დაკავშირებით გაკეთებული განცხადებები, მრევლისადმი გამოხატული მკაცრი ტონი და პრეტენზიები", — განაცხადა ერქვანიამ.

მისი აზრით, ხელისუფლება უნდა ამოყობდეს იმ ადამიანებით, რომლებიც მთელი მარხვის განმავლობაში ქარში, სიცივესა და წვიმაში გაუნძრევლად იდგნენ ტაძრის ეზოებში, იცავდნენ რეკომენდაციებს.

კორონავირუსის პანდემიის გამო, დაავადებათა კონტროლის ეროვნული ცენტრის ხელმძღვანელებმა მრევლს ეკლესიაში მისვლისგან თავის შეკავებისკენ მოუწოდეს. მიუხედავად იმისა, რომ ქვეყანაში მკაცრი საკარანტინო წესები მოქმედებდა, მთავრობამ ეკლესიებს წირვა-ლოცვის ჩატარების ნება დართო და საქართველოში მოქმედი ეკლესიების ნაწილში სააღდგომო ლიტურგიები მაინც ჩატარდა. ხელისუფლებისა და საპატრიარქოს შეთანხმების მიხედვით, მსურველები ეკლესიებში 21:00 საათამდე უნდა მისულიყვნენ და 06:00 საათამდე უნდა დარჩენილიყვნენ.