ევროპული საქართველოს ლიდერის, ელენე ხოშტარიას განცხადებით, პროკურატურამ პატრიოტთა ალიანსის საქმეზე ფორმალური და "აბსოლუტურად უპასუხისმგებლო" პასუხი გასცა. მისი თქმით, უწყებაში განუცხადეს, რომ სავარაუდო რუსულ დაფინანსებასთან დაკავშირებით გამოძიების საფუძველი არ არსებობს და აუდიტის სამსახურს მიმართეს.

"თითქოს ეს არის ჩვეულებრივი საქმე, სადაც უნდა გაერკვიონ სისწორეში და გამჭირვალეობაში ფინანსური საკითხების. დოსიეში მოყვანილია კონკრეტული თანხები, ცხრილები და ინსტრუქციები, რომელსაც მტრული სახელმწიფო, რუსეთი, პირდაპირ კრემლთან დაახლოებული პირები აძლევენ საქართველოში, არჩევნებში მონაწილე, პატრიოტთა ალიანსს. გარდა ამისა, ხაზი მინდა გავუსვა, რომ ეს არის არამარტო ინსტრუქცია, არამედ ჩვენ უკვე ვხედავთ, როგორც ბოლო პერიოდის განმავლობაში, ისე კონკრეტულად ამ წინასაარჩევნო პერიოდში, პატრიოტთა ალიანსის მხრიდან ამ დავალებების შესრულების ფაქტებს. ჩვენ ვნახეთ ბათუმში, კონკრეტული პროვოკაციული, შუღლის გაღვივების მცდელობა, როდესაც აჭარა თითქოს ოკუპირებული ტერიტორიაა", — განაცხადა მან.

ხოშტარიამ აღნიშნა, რომ ეს ეხება ეროვნულ ინტერესებს და ამ საქმის არსათანადოდ გამოძიება რუსულ ინტერესებშია, რისი პასუხისმგებლობაც ქართულ ოცნებას ეკისრება.

"აქ სიახლე არც რუსული პროპაგანდაა, არც ის, რომ რუსეთი ცდილობს არჩევნებში ჩარევას, და არც ის, რომ პატრიოთა ალიანსი პრო-რუსული, სახელმწიფოს მიმართ მტრული ძალაა. აქ საგანგაშოა ქართული სახელმწიფოს რეაქცია, რომელიც ამ ფაქტებში ვერ ხედავს ვერანაირ პრობლემას ჩვენი ეროვნული უსაფრთხოებისთვის".

მანვე კიდევ ერთხელ მიმართა სუს-ს, პროკურატურას, ყველა იმ უწყებას, რომესაც ევალება სახელმწიფოსა და მოქალაქეების დაცვა რუსული, მტრული პოლიტიკისგან, სერიოზულად მიუდგნენ ამ საკითხს.

"გამოიძიონ ეროვნული უსაფრთხოების საკითხი და არ მიცენ რუსეთს საშუალება, ასე ღიად ჩაერიონ ჩვენ წინა საარჩევნო პერიოში. ამ შემთხვევაში, მთლიანი პასუხისმგებლობა, რუსული ინტერესების გატარებისა საქართველოში, ეკისრება ქართულ ოცნებას", — განაცხადა ხოშტარიამ.

ხოშტარიამ პროკურატურას პატრიოტთა ალიანსის წინააღმდეგ გამოძიების დაწყების მოთხოვნით 25 აგვისტოს მიმართა. ამის მიზეზი ცენტრ დოსიეს გამოძიება გახდა, რომლის მიხედვითაც, პატრიოტთა ალიანსი კრემლიდან წინასაარჩევნოდ ფინანსდება. ხოშტარიას თქმით, ნორმალური სახელმწიფოს პროკურატურა მსგავსი ინფორმაციის გამოქვეყნებისთანავე, საგანგებოდ უნდა იწყებდეს გამოძიებას.

გაიგეთ მეტი:

• კრემლის საარჩევნო ფსონი პატრიოტთა ალიანსზე — დოსიეს გამოძიება და ინაშვილის "კონტრარგუმენტი"
• 8 მილიონი იმიტომ გაჟღერდა, რომ ჩვენი საარჩევნო ნომერი არის 8 — ინაშვილი რუსეთიდან სავარაუდო დაფინანსებაზე
• თუ ოკუპანტი ქვეყნიდან დაფინანსების ფაქტი დაფიქსირდა, შესაბამისი რეაგირება უნდა მოყვეს — მდინარაძე პატრიოტთა ალიანსზე
• ეს ინფორმაცია საკმარისია გამოძიების დასაწყებად — კაპანაძე დოსიეს გამოძიებასა და პატრიოტთა ალიანსზე