ევროპული საქართველოს მაჟორიტარი დეპუტატობის კანდიდატმა ელენე ხოშტარიამ დღეს, პროკურატურას პატრიოტთა ალიანსის წინააღმდეგ გამოძიების დაწყების მოთხოვნით მიმართა. მისი თქმით, ნორმალური სახელმწიფოს პროკურატურა მსგავსი ინფორმაციის გამოქვეყნებისთანავე, საგანგებოდ უნდა იწყებდეს გამოძიებას.

"გამოძიება უნდა იწყებოდეს, ძალიან ბევრი მუხლით. მაგალითად, დაფინანსება უცხო ქვეყნიდან, მითუმეტეს ოკუპანტი ქვეყნიდან ეს არის დანაშაული. ასევე, შესაძლო შპიონაჟი. ჩვენ კარგად ვიცით, რომ ქართული ოცნება არაერთხელ იყო პირდაპირ ალიანსში პატრიოტთა ალიანსთან, გასაგებია, რომ ისინი პირდაპირი სატელიტები არიან, მაგრამ, ეს საკითხი ეხება ქვეყნის უსაფრთხოებას. რუსეთს აქვს თავისი კონკრეტული ამოცანები, ქვეყნის დესტაბილიზაცია, შურის გაღვივება და დასავლეთის დისკრედიტაცია", — განაცხადა ელენე ხოშტარიამ.

ცენტრ დოსიეს განკარგულებაში აღმოჩნდა სამუშაო დოკუმენტები, ანალიტიკური ანგარიშები, ფინანსური შეფასებები, წინასაარჩევნო მეთოდები და საოპერაციო მოხსენებები გენერალ ჩერნოვის სამდივნოდან. მათი განცხადებით, ამ დოკუმენტებით ირკვევა, თუ რას წარმოადგენს ე.წ. რბილი ძალა, რომელიც კრემლიდან იმართება.

"ამჯერად თემა ეხება საქართველოში დაგეგმილ ოქტომბრის არჩევნებს. როგორც დოკუმენტებიდან ირკვევა, კრემლი ფსონს ირმა ინაშვილსა და დავით თარხან-მოურავზე დებს, რომლებიც აქტიურად აკრიტიკებენ ნატოსა და აშშ-ს. უკვე შედგენილია მრავალმილიონიანი წინასაარჩევნო ბიუჯეტი და დამონტაჟებულია სააგიტაციო ვიდეო რგოლი. ხოლო პატრიოტთა ალიანსის პოპულარიზაციისთვის პოლიტ ექსპერტი სერგეი მიხეევი და მოსკოვური კომპანია POLITSECRETS დაიქირავეს.

დოსიე აქვეყნებს 2 დოკუმენტს, რომელიც მათი განცხადებით, წყარომ მიაწოდა. მათი თქმით, ამ დოკუმენტებში ასახულია გეგმა და ხარჯთაღრიცხვა პატრიოტთა ალიანსის კამპანიისთვის. პატრიოტთა ალიანსის დეპუტატი ირმა ინაშვილი გავრცელებულ ინფორმაციას უარყოფს და ამტკიცებს, რომ რუსეთიდან დაფინანსებას არ იღებს.