სამშენებლო კომპანია m² აცხადებს, რომ იგი არ ითხოვს ჯანსაღი ხეების მოჭრის ნებართვას. კომპანიამ 19 დეკემბერს გავრცელებულ წერილთან დაკავშირებით დამატებითი განმარტება ფეისბუკ გვერდზე გააკეთა.

კომპანია განმარტავს, რომ საზოგადოების ნაწილმა არასწორად აღიქვა m²-ის ინიციატივა:

"გარწმუნებთ, რომ საქმე გვაქვს გაუგებრობასთან. ჩვენ მზად ვართ პირადად შევხვდეთ ყველა დაინტერესებულ ადამიანს და განვუმარტოთ, თუ რა იგულისხმება წერილში, რომელიც საზოგადოებამ არასწორად გაიგო."

განცხადების თანახმად, m² საქართველოს პარლამენტის თავმჯდომარეს სთხოვდა ორი საკითხების ინიცირებას:

  1. დაავადებული ხეების მოჭრაზე მოსაკრებელის გაუქმებას;
  2. მკაფიო რეგულაციების დაწესებას ხეების მოჭრის საკითხზე.

კომპანია მიიჩნევს, რომ ხეების მოჭრასთან დაკავშირებით არსებულ პროცედურებში "სრული ქაოსია". ამასთან, განცხადების თანახმად, m² მომხრეა, რომ მაგალითად, კომპანია კანონმა დაავალდებულოს, რომ 1 მოჭრილი ხის ნაცვლად დარგოს 10 ახალი ხე. m²-თვის გაუგებარია, რატომ უნდა იხდიდეს კომპანია მოსაკრებელს დაავადებული ხის მოჭრაზე.

წერილში, რომელიც 19 დეკემბერს გავრცელდა, სამშენებლო კომპანია m2 ხე-მცენარეების მოჭრის პროცედურის გამარტივებას ითხოვს. კომპანია მიიჩნევს, რომ დაავადებული ნარგავების მოჭრა კერძო მესაკუთრეს თანხის გადახდის გარეშე უნდა შეეძლოს და ქალაქის ინტერესში შედის, რომ დაავადებული მცენარეები დროულად მოიჭრას.

აღნიშნულ წერილში, ასევე წერია, რომ თბილისის ტერიტორია არსებითად დაფარულია მწვანე საფარით, ხოლო, თუ არ იარსებებს ხის მოჭრის შესაძლებლობა ბიზნესი მნიშვნელოვნად შეფერხდება და შეუძლებელი იქნება ტერიტორიების სამშენებლოდ განვითარება.