"თუ მეორე ტური იქნება, ნაციონალური მოძრაობის კანდიდატი გადავა", — ასე პასუხობს ენმ-ს მაჟორიტარობის კანდიდატი ხატია დეკანოიძე კითხვას იმის შესახებ, დაუჭერს თუ არა მხარს მეორე ტურში გიორგი ვაშაძეს. მისივე თქმით, გამარჯვებაში დარწმუნებულია, მაგრამ სხვა მოცემულობის შემთხვევაში, "ოპოზიციის კანდიდატს მხარს დაუჭერს".

დეკანოიძის თქმით, ნაციონალური მოძრაობა ოთხ ოლქში ოპოზიციის კანდიდატებს უჭერს მხარს და ამ კუთხით არაფერი შეცვლილა.

"მე არ ვებრძვი ოპოზიციის წარმომადგენელს, ვებრძვი ქართული ოცნების წარმომადგენელს, რომელიც თავისი კუთხით არც პოლიტიკური ლიდერია. დარწმუნებული ვარ, რომ ქართული ოცნების კანდიდატს დავამარცხებ, მაგრამ ჩვენ არაერთხელ გაგვიცხადებია, რომ თუ მეორე ტურები იქნება, ოპოზიციის კანდიდატებს, მხარს დავუჭერთ. არ უნდა დაგვავიწყდეს, რომ სტრატეგიულად მნიშვნელოვანია პროპორციული სიის ნაწილი. თუ პროპორციულ ნაწილში დავამარცხებთ ოცნების კანდიდატს და მობილიზებას გავუკეთებთ ხმებს, შესაძლოა, მეორე ტურში ოპოზიციის კანდიდატები აღარც დარჩნენ", — აღნიშნა დეკანოიძემ.

სტრატეგია აღმაშენებლის ლიდერმა, გიორგი ვაშაძემ განაცხადა, რომ ნაციონალურმა მოძრაობამ სიტყვა გატეხა, როდესაც ისანში კონკურენტად ხატია დეკანოიძე დაუყენა.

"ნაციონალურმა მოძრაობამ კვლავ გატეხა სიტყვა, დაარღვია შეთანხმება და ეს არის ძალიან სამწუხარო. რაც შეეხება ისანს, ისანში გაიმარჯვებს ყველაზე ღირსეული. ამას თქვენ თვითონ ნახავთ. ამის დასტურია სხვა შეთანხმების მონაწილეების განცხადებები. ძალიან ვწუხვარ...", — აცხადებს ვაშაძე.

გაიგეთ მეტი: