ბრატისლავის, ბუდაპეშტის, პრაღისა და ვარშავის მერიების შენობებზე ბელარუსის ისტორიული დროშა აღიმართება. ამის შესახებ საუბარია თავისუფალი ქალაქების პაქტში, რომელსაც ვარშავის მერი ტვიტერზე ავრცელებს.

"ბელარუსის მომავალი უნდა იყოს ბელარუს ხალხთან და არა ევროპის უკანასკნელ დიქტატორთან, ალექსანდრ ლუკაშენკოსთან და მათთან, ვინც მას ხელს აფარებს. ჩვენ მოვითხოვთ ევროკავშირისგან გადახედოს თავის პოლიტიკას ბელარუსის მიმართ და დარბევაზე პასუხისმეგებელი პირების მიმართ შესაბამისი ზომები მიიღოს. დემოკრატიული ბელარუსისთვის ბრძოლაში ჩვენმა ევროპულმა საზოგადოებამ მტკიცე პოზიცია უნდა დაიჭიროს", — ნათქვამია პაქტში.

ბელარუსში საპროტესტო აქციის მონაწილეებმა სიმბოლოდ ძველი, რამდენიმე თვიანი დამოუკიდებლობის პერიოდის დროშა აქციეს.

მომიტინგეები წითელ და თეთრ დროშას იყენებენ, როგორც ერთ დროს დამოუკიდებელი ბელარუსის სიმბოლოს, რომელსაც არ ჰქონდა თვითმყოფადობის კრიზისი. რუსეთის ან სხვა ქვეყნების მიერ მართული ბელარუსი ახლა როგორც ნაციონალური სულისკვეთების, ისე ეროვნული სიმბოლოების გარეშე დარჩა. პირველი მსოფლიო ომის დროს რუსეთის იმპერიიდან გამოსვლის და დამოუკიდებლობის გამოცხადების შემდეგ, ბელარუსის დროშა თეთრი იყო, რომელსაც შუა ნაწილში წითელი ჰორიზონტალური ხაზი ჰქონდა. საბჭოთა ბელარუსმა სხვა დროშა შექმნა, რომელსაც ქვეყანა ამ დრომდე იყენებს. მას მცირე ცვლილება აქვს — დროშაზე ნამგალი და უროს სიმბოლოებია მოშორებული.