ნოემბრის თვეში პოლიტიკური ტემპერატურა მოიმატებს და არა მხოლოდ იმის გამო, რომ აშშ-ში საპრეზიდენტო არჩევნები გაიმართება.

როგორც იქნა, ნეტფლიქსმა თავისი გახმაურებული ისტორიული დრამის — The Crown-ის მეოთხე სეზონის პრემიერის თარიღი გაგვიმხილა: ახალ სეზონს წინა სეზონის გამოსვლიდან თითქმის ზუსტად ერთი წლის თავზე ვიხილავთ — 15 ნოემბერს.

ეს ინფორმაცია ნეტფლიქსმა დამაინტრიგებელი ტრეილერით დააანონსა:

ეს ერთ წუთზე ნაკლები ხანგრძლივობის ტრეილერი განსაკუთრებულად იმით იყო მნიშვნელოვანი, რომ მასში ორი ახალი ისტორიული ფიგურა გამოჩნდა: პრინცესა დაიანა და მარგარეტ ტეტჩერი.

პრინცესა დაიანას ჯერ მხოლოდ ფრაგმენტული კადრები ვიხილეთ, თუმცა ესეც საკმარისი იყო მაყურებლებში დაძაბულობის გაზრდისთვის.

პირველ ტრეიელერში პრინცესა დაიანას ლეგენდარული საქორწინო კაბა გამოჩნდა.

ფოტო: Netflix

ამ სეზონში ლედი დის როლს ემა კორინი ასრულებს. რამდენიმე დღის წინ ცნობილი გახდა, რომ მეხუთე და მეექვსე სეზონებში მას ამ როლზე ავსტრალიელი მსახიობი ელიზაბეტ დებიკი ჩაანაცვლებს.

ახალ ტრეილერში ასევე ფრაგმენტულად გამოჩნდა დიდი ბრიტანეთის უახლოესი ისტორიული წარსულის უმნიშვნელოვანესი ფიგურა — მარგარეტ ტეტჩერი. მის როლს სერიალში ჯილიან ანდერსონი ასრულებს.

ფოტო: Netflix

"ისეთ მნიშვნელოვან რამეს, როგორიც მონარქიაა, უბრალოდ არ აქვს უფლება, რომ შეცდომა დაუშვას", — ამბობს ელიზაბეტ მეორე ტრეილერში, რაც იმ დაძაბულობის შესახებ გვამცნობს, რომელიც პრინცესა დაიანას გამოჩენამ გამოიწვია სამეფო ოჯახში.

ელიზაბეტ მეორეს როლს ოსკაროსანი მსახიობი ოლივია კოლმანი ასრულებს და ეს ბოლო სეზონი იქნება, სადაც მას ამ აპლუაში ვიხილავთ: მეხუთე სეზონიდან მას ასევე ცნობილი ბრიტანელი მსახიობი იმელდა სტონტონი ჩაანაცვლებს.