სტრატეგია აღმაშენებლის ლიდერის, გიორგი ვაშაძის განცხადებით, თუ ოპოზიცია შეთანხმებას ერთი მანდატით მეტის მიღების ცდუნების გამო არ გაუფრთხილდება, ეს ნიშნავს, რომ 8 წელმა არაფერი ასწავლათ. მისი მტკიცებით, ის და მისი გუნდი სიტყვას არ გადავლენ, რადგან მისთვის "კაცობა ცხოვრების უპირველესი პრინციპია".

"როცა დიდი საქმეების კეთებაზე გვაქვს ამბიცია, უნდა გვესმოდეს, საერთო ოპოზიციური კანდიდატები, საერთო ოპოზიციური კოორდინაცია საერთო გამარჯვებისთვის გვჭირდება და თუ ვინმე ამ შეთანხმებას ერთი მანდატით მეტის მიღების ცდუნების გამო არ უფრთხილდება, ეს ნიშნავს, რომ სამწუხაროდ, ამ რვა წელმა ვერაფერი გვასწავლა.

ნათქვამია, განგება ვინმეს ჩამოშორებას რომ გადაწყვეტს, ჯერ ჭკუას გამოაცლისო, გულწრფელად არ მინდა, ეს გამოთქმა გამართლდეს ზოგიერთ ჩემი კოლეგისა და პარტნიორის მიმართ", — განაცხადა ვაშაძემ.

გიორგი ვაშაძემ და თაკო ჩარკვიანმა ოპოზიციის გაერთიანება ძალა ერთობაშია 26 ივლისს დატოვეს და ახალი პოლიტიკური პლატფორმა, სტრატეგია აღმაშენებელი წარადგინეს. მათი განცხადებით, სტრატეგია აღმაშენებელი ამ ეტაპზე კიდევ ორ სუბიექტს — ახალი საქართველო და კანონი და სამართალს აერთიანებს.

კოალიციიდან წასვლის შემდეგ ვაშაძე ენმ-ს წევრებმა გააკრიტიკეს. მათ შორის, პარტიის ლიდერმა, მიხეილ სააკაშვილმა მისი წასვლა "ბნელ მხარეზე" გადასვლად შეაფასა. პასუხად ვაშაძემ ვარსკვლავური ომების პერსონაჟის ტანზე თავი მიიფოტოშოფა და დაპოსტა, რომ ბნელ ძალას დაამარცხებდა.

რაც შეეხება მაჟორიტარ კანდიდატებს, გიორგი ვაშაძე ოპოზიციის გაერთიანების საერთო კანდიდატებს შორის იყო დასახელებული იქამდე, სანამ ძალა ერთობაშიას დატოვებდა.