მათთვის, ვისაც ახალი წლის გატარება ქალაქგარეთ, ზამთრის კურორტზე, ან ბუნებაში მდებარე სასტუმროში აქვს გადაწყვეტილი და ლარის რეკორდულმა გაუფასურებამაც დიდად არ დააზარალა, On.ge-მ მოიძია ფასები, თუ რა დაუჯდება წყვილს, ან მეგობრების ჯგუფს საქართველოში საახალწლოდ დასვენება.

ბაკურიანი

ბაკურიანი ერთ-ერთი ყველაზე პოპულარული ადგილია ზამთრის კურორტებს შორის. სხვა კურორტების მსგავსად, ფასები აქაც შთამბეჭდავია. Booking.com-ზე მინიმალური ფასები ბაკურიანში ღამეზე დაახლოებით 100 ლარიდან იწყება და ათას ლარსაც კი აჭარბებს.

მაგალითად, 3 ღამით [30 დეკემბერი -2 იანვარი], ცენტრისგან 7 კილომეტრით მოშორებული გესთ-ჰაუსი 2 ადამიანს 340 ლარად მიიღებს.

3 ვარსკვლავიან სასტუმრო მგზავრებში 2 ადგილიანი ნომრის 1 ღამით დაქირავება საახალწლო დღეებში $115-დან $140-მდე ღირს. ამ ფასში შედის საახალწლო სუფრაც.

რაც შეეხება 3 საწოლიან ხის კოტეჯს, ის 1 ღამით $210 ღირს.

ორბი პალასში მხოლოდ 1 ადგილია დარჩენილი, სადაც 2 ადამიანს 3 ღამის გატარება 925 ლარად შეუძლია.

ბაკურიანის სასტუმროებში ახალი წლის ღამეების (3 ღამე) გატარება 2 ადამიანს ყველაზე დაბალ ფასად, 525 ლარად, სასტუმრო სანტაში შეუძლია, რომელიც მომხმარებლებს აუზსა და რესტორანსაც სთავაზობს.

ამავე კურორტზე 9 110 ლარი ღირს 12-ოთახიანი კოტეჯის დაქირავება 3 ღამით Art Villa-ში, ასევე Crystal Hill-ში - 4 485 ლარი 6 ადამიანისთვის.

გუდაური

შერჩეული სამი ღამის ფარგლებში, 30 დეკემბრიდან 2 იანვრამდე, გუდაურში ყველაზე დაბალ ფასად 3 ადამიანისთვის განკუთვნილი ნომრის დაქირავება ჯამში 840 ლარად შეიძლება სასტუმროში გიო. ნომრის საფასურში შედის თევზაობა და თხილამურებით სრიალიც.

სასტუმროებში, გუდ აურა, მონტე და მარკო პოლო, საახალწლო დღეებში უკვე ყველა ადგილი გაყიდულია.

ორი ადამინისთვის 1 ნომერია დარჩენილი სასტუმრო Carpe Diem-ში, რომელიც 3 ღამით 1482 ლარი ღირს. სასტუმროს მომსახურებაში შედის კლუბი, კინოთეატრი, საუნა და ა.შ.

ბორჯომი

სასტუმრო ბორჯომი პალასში 2 ოთახიანი 3 ნომერია დარჩენილი, რომელიც 3 ღამის განმავლობაში 1 870 ლარი ღირს. სასტუმროში არის კარაოკე ბარი, სპა ცენტრი, სავარჯიშო დარბაზი, საუნა, ბილიარდი. ბორჯომი პალასი სტუმრებს მასაჟის სერვისსაც სთავაზობს.

გესთ-ჰაუს ბორჯომში საახალწლოდ სამი ღამის გატარება ორ ადამიანს 300 ლარი დაუჯდება, ხოლო ასევე სახლის სასტუმროს ტიპის გესთ-ჰაუსი ლიკანში 150 ლარი ღირს.

Crowne Plaza-ში უკვე ყველა ადგილი გაყიდულია.

ლიკანი პალასი, რომელიც ჯანმრთელობისთვის მნიშვნელოვან პროცედურებსაც სთავაზობს მომხმარებელს, 3 ღამით 150 ლარი ღირს. ეკო-სასტუმროში 1 ცალი 2 ადგილიანი ნომერია დარჩენილი.

კახეთის მასშტაბით

ამბასადორი კაჭრეთში 30 დეკემბრიდან 2 იანვრამდე 3 ღამე 2 ადამიანს 1 804 ლარი დაუჯდება. სასტუმროს მომსახურების სერვისებში შედის აუზი, ფიტნესის დარბაზი, მაგიდის ჩოგბურთისა და ბილიარდის მაგიდები, ასევე, ჩოგბურთის კორტები.

რაც შეეხება ყვარლის ტბას, როიალ ბატონს და ლოპოტას, ახალი წლის დღეებში უკვე ყველა ადგილი გაყიდულია.

ყვარელში, მწვანე სახლში (Green house), 2 კაციანი 2 ნომერია დარჩენილი, სადაც სამი ღამის საფასური 240 ლარია.

სასტუმრო შატო ყვარელში, საახალწლოდ, 3 ღამის წინასწარ დაჯავშნა 480 ლარადაა შესაძლებელი.

ბათუმი

5 ვარსკვლავიან სასტუმრო ჰილტონში საახალწლოდ 7 ნომერია დარჩენილი. 30 დეკემბრიდან 2 იანვრამდე 3 ღამე 2 ადამიანს $475 დაუჯდება. მომსახურებაში შედის აუზი, ფიტნესის ოთახი და სხვა. სასტუმროში არის რესტორნები და მაღაზიათა ქსელიც.

ახალი წლის ღამეს ბრანჩის პროგრამის მიღების შემთხვევაში, რომელიც ამერიკულ მენიუს გულისხმობს და დილის ცხრიდან შუა დღის 3 საათამდე გრძელდება, 3 დღის ღირებულება 510 ლარამდე გაიზრდება.

ბათუმის მგზავრებში საახალწლოდ სამი ღამე 2 ადამიანს 408 ლარი დაუჯდება. დარჩენილია 1 ნომერი. სტანდარტულ სერვისებთან ერთად, სასტუმროს მომსახურებაში შედის საუნაც.

ბათუმის რადისონში 1 ნომერია დარჩენილი 2 კაცისთვის, რომელიც 3 ღამით, ახალი წლის დღეებში, 1 820 ლარი ღირს.

სვანეთი

უშბას გესთჰაუსში, რომელიც სტუმრებს სათხილამურო გარემოს სთავაზობს, საახალწლოდ დასვენება 2 კაცს 4 დღით და 3 ღამით 300 ლარად შეეძლება. ფასში შედის კვების ღირებულებაც.

სასტუმრო თეთნულდში, რომელიც მესტიაში მდებარეობს, 3 საახალწლო ღამე 816 ლარი ღირს.

ყაზბეგი

და ბოლოს, რუმსის სასტუმრო ყაზბეგში, რომელშიც 30 დეკემბრიდან 2 იანვრამდე 3 ღამე 2 ადამიანს 3 257 ლარი დაუჯდება, 3 ნომერია დარჩენილი.