პარლამენტის ვიცე-სპიკერის, გია ვოლსკის გაცხადებით, ქართული ოცნება კოალიციური მთავრობის შესაქმნელად პატრიოტთა ალიანსთან თანამშრომლობას არ აპირებს. დეპუტატი ამის მიზეზად ალიანსის საგარეო პოლიტიკურ შეხედულებებს ასახელებს, რომელსაც "ქვეყნისთვის დამაზიანებელს" უწოდებს. ასე ეხმაურება ის თანაგუნდელ რეზო არველაძის განცხადებას, რომელმაც თქვა, რომ თუ არჩევნებში "ოცნებას" ხმები დააკლდება, პარტნიორობის შესაძლებლობას პატრიოტთა ალიანსთან ხედავს.

"არამგონია, პატრიოტთა ალიანსმა თავისი შეხედულებები საგარეო პოლიტიკაზე შეცვალოს, რასაც ჩვენ არათუ კატეგორიულად არ ვეთანხმებით, მგონია რომ დამაზიანებელია ქვეყნისათვის ეს პოზიცია", — განაცხადა გია ვოლსკიმ.

მისივე თქმით, ქართული ოცნება არ აპირებს არავისთან თანამშრომლობას კოალიციური მთავრობის შესაქმნელად. ვოლსკი ამბობს, რომ პარტიას გააჩნია რესურსი გაიმარჯვოს არჩევნებში და ინდივიდუალურად დააკომპლექტოს მთავრობა.

"არ ვიცი რეზო არველაძე ვისთან აპირებს თანამშრომლობას, ყოველ შემთხვევაში ქართულ ოცნებას აქვს ის რესურსი, რომ გაიმარჯვოს არჩევნებში და დააკომპლექტოს მთავრობა. ამ ეტაპზე არავისთან, არც პატრიოტთა ალიანსთან და არც სხვა რომელიმე პოლიტიკურ პარტიასთან არ განიხილება [კოალიცია]", — განაცხადა ვოლსკიმ.

ქართული ოცნების დეპუტატმა რეზო არველაძემ განაცხადა, რომ იმ შემთხვევაში თუ ქართულ ოცნებას მთავრობის შესაქმნელად ხმები დააკლდება, პარტნიორობის შესაძლებლობას პატრიოტთა ალიანსთან ხედავს. ამის შესახებ დეპუტატმა მთავარ არხთან სატელეფონო ინტერვიუში ისაუბრა. რეზო არველაძე აკონკრეტებს, რომ ეს მისი პირადი პოზიციაა და პარტიასთან შეთანხმებული არ არის.