გიორგი შაქარაშვილის საქმეზე განზრახ მკვლელობის მუხლით ბრალდებულთა ადვოკატები წინასასამართლო სხდომის გადადებას ითხოვენ. მათ ამ მოთხოვნით მცხეთის რაიონულ სასამართლოს უკვე მიმართეს.

5 ბრალდებულის საქმეზე წინასასამართლო სხდომა 27 აგვისტოს არის ჩანიშნული. მორაგბე არჩილ გაგნიძის ადვოკატი, ალექსანდრე კობაიძე On.ge-სთან აცხადებს, რომ სასამართლომ დაცვის მხარეს მტკიცებულებების მოპოვების შესაძლებლობა შეუზღუდა.

"40 დღით გადავადება მოვითხოვეთ, 40 დღეში უნდა მოგვეცეს საშუალება, რომ მთელი რიგი მტკიცებულებები წარვადგინოთ. მოგეხსენებათ, ფაქტიურად შეგვიზღუდა როგორც ბრალდების მხარემ, ასევე სასამართლომ, რომ მტკიცებულებები მოგვეპოვებინა ესეთ მნიშვნელოვან საქმეზე, მაგის საშულებას არ გვაძლევს. ამიტომ ლოგიკურია ჩვენი მოთხოვნა. ვისი დაცვის ქვეშ მყოფსაც ბრალი დაუმძიმდა, ყველამ მოვითხოვეთ ეს", — აცხადებს კობაიძე.

რაც შეეხება არასრულწლოვანი ბრალდებულის, ზ.ხ-ს ადვოკატს, გიორგი გელხაურს, იგი აცხადებს, რომ ორკვირიანი ვადა დაცვის ქვეშ მყოფების ინტერესების დასაცავად საკმარისი არ არის.

"მხოლოდ ორკვირიანი ვადა მოგვცა სასამართლომ და მოვითხოვეთ სასამართლოს სხდომის ვადის გაგრძელება, რომ ჯეროვნად შევძლოთ ჩვენი დაცვის ქვეშ მყოფების ინტერესების დაცვა. ბუნებრივია, რომ ეს დრო არ არის საკმარისი და სასამართლოს შეეძლო მოეცა ვადა, რომ დაცვის მხარეც მომზადებულიყო", — აცხადებს გელხაური.

შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმეს. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-სა და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.