მეგობრებთან ერთად გართობა სახალისოა, თუმცა ზოგჯერ ზედმეტი კომუნიკაციისგან დასვენება და ბუნებასთან განმარტოვება გვჭირდება. ასეთი ადგილების პოვნა საქართველოში არ არის ძნელი, საბედნიეროდ, ჩვენ ერთ-ერთი ყველაზე მწვანე ქვეყანა ვართ, სადაც უხვად არის ბიომრავალფეროვნება. მდიდარი ფლორა და ფაუნა, ადამიანებისგან, ავტომობილებისგან და გიგანტური შენობებსიგან თავისუფალი სივრცეები საშუალებას გვაძლევს, დავტკბეთ პირველყოფილი ბუნების მშვენიერებით და შევიგრძნოთ ჰარმონია.

ქვემოთ საქართველოში არსებულ იმ ადგილებს წარმოგიდნეთ, რომლებიც ძალების სიმშვიდეში აღდგენისთვისაა ზედგამოჭრილი.

1. პირიქითა ხევსურეთი

პირიქითა ხევსურეთი დათვიჯვრის უღელტეხილის მიღმა მდებარეობს, რომელიც არა მხოლოდ ხევსურეთს ყოფს პირაქეთად და პირიქითად, არამედ ევროპასა და აზიასაც მიჯნავს ერთმანეთისგან. პირიქითა ხევსურეთში, ფაქტობრივად, მხოლოდ ერთი დასახლებული სოფელია (თუ არ ჩავთვლით ხახაბოს, სადაც მხოლოდ ერთი მოსახლეა, საავტომობილო გზა არ მიდის და ფეხით გასავლელი მანძილი 10 კილომეტრია) — შატილი. დასასვენებელი კეთილმოწყობილი სახლიც სწორედ შატილში შეგიძლია იპოვო, ხოლო აქედან ფეხით თუ ავტომობილით მოიარო მთელი პირიქითა ხევსურეთი — კისტანი, ლებაისკარი, ანატორი, მუცო და არდოტი.

2. ზემო რაჭა

ზემო რაჭა საქართველოს ერთ-ერთი ყველაზე პოპულარული და ტურისტულად მიმზიდველი ლოკაცია იყო საბჭოთა კავშირის დროს, სადაც არსებობდა იმ დროისათვის თანამედროვე ინფრასტრუქტურა და სერვისები. 90-იან წლებში შექმნილი კრიზისის და ეკონომიკური კოლაფსის შედეგებს რაჭა დღემდე ებრძვის, თუმცა ეკონომიკურ თუ ინსფრასტრუქტურულ პრობლემებს მისი ბუნების მშვენიერებისთვის არაფერი დაუკლია. კურორტი შოვი ძველი დიდების გაქვავებული ნაშთია, რომელიც ოდნავ შელახულ სამოსს არ უჩივის და მისი სიტურფე დღემდე იტაცებს თვალს.

3. ნინოწმინდა

ნინოწმინდა საქართველოს სამხრეთის მშვენებაა. აქ არსებული აყვავებული მინდვრები, ტბების სიუხვე და ცოცხალი ბუნების მრავალფეროვნება ნამდვილ მიწიერ სამოთხედ აქცევს უმეტესად ალპური კლიმატის მხარეს. აქ შეგიძლია შეხვდე იშვიათ ფრინველებს, მოინახულო ტბები და კანიონი, უგზო-უკვლოდ იხეტიალო ნაირფერად აჭრელებულ მინდვრებში და გაიცნო მრავალეთნიკური კულტურა და მისი სამზარეულო.

4. თუშეთი

თუშეთი საკმაოდ ხალვათად დასახლებული მხარეა, სადაც ციდან უძველესი ციხე-კოშკები გიყურებენ და ლეგენდები შენ თვალწინ ცოცხლდებიან. თუშეთის დაცულ ტერიტორიებზე ფაუნა 180-მდე სახეობითაა წარმოადგენილი. ხოლო, აქ არსებული 18 სახეობა საქართველოს "წითელ ნუსხაშია" შესული. ძუძუმწოვრებიდან აღსანიშნავია: ევროპული მაჩქათელა, წავი, მურა დათვი, ჯიხვი, ნიამორი, ირემი, კავკასიური როჭო და კავკასიური შურთხი. იშვიათი სახეობის ფრინველებიდან კი გავრცელებულია: ბექობის არწივი, დიდი მყივანი არწივი, ველის კირკიტა, ღალღა, ველის არწივი, ძერა, სვავი და ველის ძელქორი.

5. ლაგოდეხის ნაკრძალი

ლაგოდეხის ნაკრძალი ერთ-ერთი ყველაზე კეთილმოწყობილი და მარკირებული დაცული ტეროტირიაა საქართველოში როგორც საფეხმავლო ლაშქრობის დასაგეგმად, ასევე საცხენო ტურისთვის. აქ არსებული რამდენიმე ბილიკიდან განსაკუთრებულად საინტერესო გურგენიანის ჩანჩქერის და შავი კლდეების ბილიკია. პირველი მათგანი ადვილ სალაშქრო ბილიკად მიიჩნევა და ფეხით ასასვლელად და ჩამოსასვლელად სულ ერთი დღე დაგჭირდება. ხოლო შავი კლდეების ტბისთვის სამი დღე უნდა გამოყო. უმჯობესია, ცხენი იქირაო ნაკრძალის ვიზიტორთა ცენტრში. აქ შემოდგომაზე ველური ბუნების უმშვენიერეს არსებებს შეხვდები, მათ შორის ჯიხვს. ტყის მასივების გავლის შემდეგ ალპური მდელოები გელოდება, ბილიკის ბოლოს კი — უმშვენიერესი შავი კლდეების ტბა.

მთაში, ბარში თუ ზღვაზე, მთელი საქართველოს მასშტაბით შეგიძლია მარტივად ნახო საშენო დასასვენებელი სახლი rent.myhome.ge-ზე. ახალი პლატფორმის მეშვეობით, ონლაინ დაჯავშნით შენთვის სასურველ ნებისმიერი ტიპის ქონებას — ბინას, სახლს, სასტუმროს თუ კოტეჯს იპოვი და ვებგვერდიდან გაუსვლელად მიიღებ ინფორმაციას სხვა დამატებითი სერვისების შესახებ.