ძაღლები ძალიან სოციალური არსებები არიან და ყველაფერში აქტიური მონაწილეობა უყვართ. ამასთანავე ისინი ყველაფერს ადვილად ითვისებენ და ნებისმიერ ადგილს ეგუებიან.

პიტ ბული, სახელად მაკო, ამის თვალსაჩინო მაგალითია, ოღონდ, ცოტა სხვანაირად.

როცა ბეტანი და სამანტა კასტილერებმა იგი თავშესაფრიდან აიყვანეს, ფიქრობდნენ, 2 წლის ძაღლი თუ მოახერხებდა მათ კატებთან შეგუებას.

"თავდაპირველად, კატები სახლის განცალკევებულ ნაწილში გადავიყვანეთ, რადგან გვსურდა, ნელ-ნელა გაგვეცნო მათთვის ახალი ძაღლი", — ამბობს ბეტანი, — "მოულოდნელად, მაკომ პატარა მაგიდებსა და მთელ სახლში ხტომა დაიწყო, ჩვენ კი ვიფიქრეთ, რომ ის, უბრალოდ, ძალიან გახარებული და ენერგიით სავსე იყო".

როგორც აღმოჩნდა, ბეტანის და სამანტას სანერვიულო არაფერი ჰქონიათ. მაკოსთვის ალბათ ძალიან ნაცნობი იყო კატების გარემოცვაში ყოფნა. იმდენად ნაცნობი, რომ ფიქრობს, თავადაც ერთ-ერთი მათგანია!

როგორც თავშესაფრიდან აყვანილი ცხოველების უმეტესობამ, მაკომაც თავად აირჩია ახალი ოჯახი.

"როცა თავშესაფარში მივედით, მაკომ მხარს ზემოდან გამოგვხედა და თვალი გაგვისწორა. იმწუთიდანვე შეგვიყვარდა ეს პატარა ბიჭი", — ამბობს ბეტანი, — "ამ დროს იგი დიდთავა თოჯინას ჰგავდა, რადგან ტანზე დიდი თავი ჰქონდა, თუმცა ჩვენთვის ძალიან საყვარელი იყო".

სანამ ბეტანი და სამანტა მაკოს კატებს გააცნობდნენ, მანამდე ვერ მიხვდნენ, რომ იგი მათსავით იქცეოდა.

"კატები რომ სამზარეულოს ბარზე ისხდნენ, მაკოც ახტებოდა ხოლმე. სულ მათთან ყოფნა სურდა".

როგორც ჩანს, მაკო თავის ძველ სახლში კატებთან ერთად იზრდებოდა და მათგან გრაციოზულობა და სისხარტეც ისწავლა. სხვაგვარად, როგორც ახსნიდით განჯინის ან მაცივრის თავზე შემომჯდარი პიტ ბულის ქცევას?

ფოტო: mako_thecatdog