"დღეს რუსეთის აგრესიიდან 12 წელი გავიდა, მისი გავლენები კი კვლავ იგრძნობა", — ნათქვამია განცხადებაში, რომელსაც ევროპარლამენტის საგარეო ურთიერთობათა კომიტეტის თავმჯდომარე, დევიდ მაკალისტერი, სამხრეთ კავკასიასთან ურთიერთობათა დელეგაციის თავმჯდომარე, მარინა კალიურანდისა და ევროპარლამენტში საქართველოს საკითებხზე მომხსენებლი, სვენ მიქსერი აქვეყნებენ.

"საქართველოს ტერიტორიის 1/5 კვლავ ოკუპირებულია, ათობით ათასი ადამიანი კვლავ ვერ უბრუნდება საკუთარ საცხოვრებელ ადგილს და ეზღუდებათ ფუნდამენტური უფლებები და თავისუფლება. საქართველო კვლავ სხვადასხვა რუსული ჰიბრიდული აქტივობის სამიზნეა, როგორებიცაა სადეზინფორმაციო კამპანიები და კიბერ-შეტევები" — აცხადებენ ისინი.

განცხადებაში ნათქვამია, რომ ამ მოვლენამ მხოლოდ გააძლიერა საქართველოს ევრო-ატლანტიკური სტრუქტურებთან ურთიერთობა და ქვეყანამ თავი დაიმკვიდრა, როგორც ერთ-ერთმა დასაყრდენმა პარტნიორი აღმოსავლეთ სამეზობლოში.

"ევროკავშირთან გაძლიერებულმა თანამშრომლობამ, ასოცირების შეთანხმების, ღრმა და ყოვლისმომცველი თავისუფალი ვაჭრობის ხელშეკრულების და ვიზალიბერალიზაციის მეშვეობით საქართველოს მოსახლეობამ პირდაპირი და ხელშესახები სარგებელი მოუტანა" — ვკითხულობთ დოკუმენტში.

განცხადებაში ნათქვამია ისიც, რომ აფხაზეთისა და ოკუპირებული ცხინვალის რეგიონის მოსახლეობა ვერ იღებს ევროკავშირთან ურთიერთობების გაღრმავებით მიღებულ სარგებელს.

"ჩვენ კვლავ მტკიცე მხარდაჭერას ვუცხადებთ საქართველოს დამოუკიდებლობას და ტერიტორიულ მთლიანობას მის საერთაშორისოდ აღიარებულ საზღვრებში და მოვუწოდებთ რუსეთს, გადადგას ნაბიჯები კონფლიქტის მშვიდობიანი მოგვარებისკენ ", — აღნიშნულია განცხადებაში.

დოკუმენტში საუბარია ცეცხლის შეწყვეტის შეთანხმების შესრულების აუცილებლობის შესახებაც.

ავტორების მკაფიო გზავნილია, რომ რუსულმა მხარემ უნდა შეასრულოს თავისი ვალდებულებები და მისცეს ევროკავშირის სადამკვირვებლო მისიას ოკუპირებულ ტერიტორიაზე წვდომის უფლება, რუსეთმა შეწყვიტოს უკანონო ბორდერიზაცია და ადამიანების ფუნდამენტური უფლებების დარღვევა.

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები