თამარ ბაჩალიაშვილის საქმესთან დაკავშირებით საქართველოს შინაგან საქმეთა სამინისტრო ამერიკის საგამოძიებო ბიუროსთან თანამშრომლობისთვის მზადყოფნას გამოთქვამს. როგორც On.ge-ს უწყებაში უთხრეს, თანამშრომლობის მიზნით შსს-მ ბაჩალიაშვილის ოჯახს შეხვედრა შესთავაზა.

"შინაგან საქმეთა სამინისტრო დაუკავშირდა თამარ ბაჩალიაშვილის ოჯახის ადვოკატს მათ მიერ გაკეთებულ განცხადებასთან დაკავშირებით, რომელიც ეხებოდა საქმეში ამერიკის ფედერალური ბიუროს ჩართულობას. სამინისტრო გამოთქვამს მზადყოფნას აღნიშნულ პროცესში ამერიკის საგამოძიებო ბიუროსთან თანამშრომლობის შესახებ და ამ მიზნით დღეს ოჯახს შეხვედრა შესთავაზა", — განაცხადეს უწყებაში.

გარდაცვლილი თამარ ბაჩალიაშვილის მამის, ჯუმბერ ბაჩალიაშვილის განცხადებით, ამერიკის საელჩოს წარმომადგენლებთან შეხვედრის შემდეგ მათ მცირე იმედი მიეცათ. როგორც მან ფორმულას ეთერში თქვა, საელჩო ოჯახს, შეძლებისდაგვარად, ყველაფერში დახმარებას დაჰპირდა.

"ინფორმაცია მივაწოდეთ, რაც ხდება ამ უსამართლო გამომძიებლებთან. გულთან ახლოს მიიტანეს, ყველანაირად, შეძლებისდაგვარად, დაგეხმარებითო", — განაცხადა ჯუმბერ ბაჩალიაშვილმა.

მისი თქმით, კონკრეტულად როდის შეხვდებიან ამერიკის ელჩს, კელი დეგნანს ამ დღეებში ეცოდინებათ. ჯუმბერ ბაჩალიაშვლმა ასევე განაცხადა, რომ 5 აგვისტოს შინაგან საქმეთა სამინისტროში შეხვედრაზე რამდენიმე მთავარი კითხვა ექნება. კეძოდ რატომ გაიხსნა კომპიუტერი, რატომ გამოჩნდა მანქანა გზის გადაკეტვის შემდეგ და სხვა კითხვები, რომელთა დასმას აპირებს, მიუხედავად იმისა, როგორც მან აღნიშნა, შსს-ს არ ენდობა, რადგან იქ "ზღაპრებს ყვებიან".

თამარ ბაჩალიაშვილის ოჯახის წევრებმა და ახლობლებმა FBI-ს ჩართვის მოთხოვნით აშშ-ს საელჩოსთან საპროტესტო აქცია გამართეს. აქციაზე მხარდასაჭერად მისული იყო სპეცოპერაციის დროს მოკლული თემირლან მაჩალიკაშვილის მამა, მალხაზ მაჩალიკაშვილი.

გარდაცვლილის დედა, თეონა თამაზაშვილი აცხადებს, რომ თუ გამოძიებაში FBI არ ჩაერთვება, აშშ-ს საელჩოს წინ შიმშილობას დაიწყებს.