კინომოყვარულებს არაფერი ახარებთ იმაზე მეტად, როცა ორი კარგად ნაცნობი ნიჭიერი ხელოვანი ერთად იწყებს თანამშრომლობას. ჰოდა, მალე, შესაძლოა, პოლ თომას ანდერსონისა და ბრედლი კუპერის კოლაბორაცია ვიხილოთ.

The Hollywood Reporter-ის ცნობით, ბრედლი კუპერთან აქტიური მოლაპარაკებები მიმდინარეობს, რათა პოლ თომას ანდერსონის ახალ ფილმში ითამაშოს. გავრცელებული ინფორმაციით, ანდერსონის შემდეგი ფილმის სიუჟეტი კალიფორნიის შტატში მდებარე სან ფერნანდოს ხეობაში განვითარდება და მასში 1970-იანი წლების მოვლენები იქნება ასახული.

პოლ თომას ანდერსონის ერთგულმა მაყურებლებმა კარგად იციან, რომ ამ გეოგრაფიულ მდებარეობას რეჟისორის შემოქმედებაში დიდი ადგილი უჭირავს: ის ანდერსონის მშობლიური მხარეა, რომელიც სხვადასხვა დროს თავის სამ ფილმში გააცოცხლა — Boogie Nights, Magnolia და Punch-Drunk Love.

ანდერსონს ფილმის გადაღებები გასულ გაზაფხულს უნდა დაეწყო და ზაფხულის ბოლოს დაესრულებინა, თუმცა სხვა ბევრი პროექტის მსგავსად, ამ ჩანაფიქრსაც ხელი პანდემიამ შეუშალა. რეჟისორი იმედოვნებს, რომ ახალ კინოსურათზე მუშაობის დაწყებას შემოდგომაზე მაინც შეძლებს.

პოლ თომას ანდერსონი და ხოაკინ ფენიქსი ფილმის The Master (2012) გადაღებებზე.

ფოტო: The Weinstein Company

ბრედლი კუპერი ამავდროულად ოსკაროსანი რეჟისორის გილერმო დელ ტოროს ახალ ფილმში Nightmare Alley იღებს მონაწილეობს. მასთან ერთად ამ ესპანელი ხელოვანის მომავალ პროექტში ვიხილავთ რუნი მარას, უილემ დეფოს, ქეით ბლანშეტსა და ტონი კოლეტს.

ცოტა ხნის წინ გილერმო დელ ტორომ განაცხადა, რომ ფილმის ნახევარი უკვე გადაღებული ჰქონდათ, რა დროსაც მარტში პანდემიამ ხელი შეუშალა და გეგმების გადადება მოუწია.

აღსანიშნავია, რომ ბრედლი კუპერმა თავისი სამსახიობო კარიერის განმავლობაში ოსკარის რვა ნომინაცია მიიღო, მათ შორის ფილმებისთვის American Sniper, American Hustle, Silver Linings Playbook და A Star Is Born. მათ შორის ეს უკანასკნელი მისი სადებიუტო სარეჟისორო ნამუშევარი იყო, რომელმაც ჯამში ასევე ოსკარის რვა ნომინაციის მოპოვება მოახერხა.