დღეს ივანე ჯავახიშვილის სახელობის თბილისის სახელმწიფო უნივერსიტეტის რექტორის არჩევნები ჩატარდება. თანამდებობის დასაკავებლად 3 კანდიდატი იბრძვის, მათ შორისაა თსუ-ს მოქმედი რექტორი, გიორგი შარვაშიძეც.

მოქმედი რექტორის გარდა აღნიშნული თანამდებობის დასაკავებლად კონკურსში გიორგი ბარამიძე და ცირა ბარამიძეც მონაწილეობენ. რექტორობის კანდიდატებთან გასაუბრება Zoom-ის პლატფორმის გამოყენებით გაიმართება.

არჩევნების შედეგები ძალაში 2020 წლის 24 სექტემბერს შედის, მოქმედი რექტორის უფლებამოსილების ამოწურვის თარიღიდან.

თბილისის სახელმწიფო უნივერსიტეტის რექტორის თანამდებობას გიორგი შარვაშიძე 2016 წლიდან იკავებს.

2019 წელს რადიო თავისუფლებამ და სტუდია მონიტორმა მოამზადეს მასალა თსუ-ს რექტორის დისერტაციაში პლაგიატის შესახებ. 2020 წლის 21 იანვარს კი ამავე უნივერსიტეტის პროფესორმა, იაგო კაჭკაჭიშვილმა გაავრცელა ინფორმაცია, რომ ილიაუნის საბჭომ პლაგიატი დაადგინა, რაც შარვაშიძის ნაშრომის 34% იყო.

შარვაშიძე პლაგიატს 2019 წელსაც უარყოფდა. მაშინ გამოქვეყნებული ჟურნალისტური გამოძიების მიხედვით, რექტორის დისერტაციაში უცვლელადაა გადატანილია 2002 წელს ღია საზოგადოების ფონდის მხარდაჭერით მომზადებული დოკუმენტის ტექსტი. სტუდია მონიტორის გამოძიების თანახმად, ტექსტს წყარო მითითებული არ აქვს. თბილისის სახელმწიფო უნივერსიტეტი თავისუფლების მონიტორის ჟურნალისტის წინააღმდეგ ეთიკის ქარტიაში დავობდა, თუმცა დარღვევა არ დადგინდა.

რამდენიმე დღის წინ თსუ-ს პროფესორმა, იაგო კაჭკაჭიშვილმა განაცხადა, რომ მას შემდეგ, რაც, თსუ-ს რექტორი, გიორგი შარვაშიძე პლაგიატში ამხილა, მასზე შურისძიების რამდენიმე სერია მოაწყვეს. მისი განმარტებით, უნივერსიტეტში შექმნილმა ეთიკის კომისიამ, თავისივე დისერტაციის გამო, მეცნიერულ არაკეთილსინდისიერებაში დაადანაშაულა.