თბილისის მერიის ცნობით, ნარიყალაზე ციხე-სიმაგრის რეაბილიტაციის პროექტის პირველი ეტაპით გათვალისწინებულ სამუშაოები მიმდინარეობს. ამის შესახებ, მერიამ 11 დეკემბერს განცხადება გაავრცელა, სადაც ასევე წერს, რომ ციხის რეაბილიტაცია 2016 წლის ოქტომბერში დაიწყო და 2017 წლის ბოლოს დასრულდება.

ციხე-სიმაგრის რეაბილიტაციისთვის ბიუჯეტიდან გამოყოფილია 726 983 ლარი, აქედან 300 000 ლარი 2016 წლის სამუშაოებზე დაიხარჯება.

ნარიყალას ციხის რეაბილიტაცია პროექტ "ახალი ტფილისის" ერთ-ერთი მიმართულების - ისტორიულ-კულტურული ძეგლების რეაბილიტაციის პროგრამით ხორციელდება.

მერიის განმარტებით, პროექტის პირველ ეტაპზე გათვალისწინებული სამუშაოები მოიცავს კლდოვანი ფუძე-საძირკვლების გამაგრებას, ძველი სატრაპეზოს დემონტაჟსა და მიმდებარე ტერიტორიაზე ახლის მოწყობას:

"არსებული სატრაპეზო აგებულია სპონტანურად და ფარავს კედლის მნიშვნელოვან ისტორიულ ნაწილს. ახალი პროექტით, ახალი სატრაპეზო კომუნიკაციების ნაკლებად სახიფათო ზოლში აიგება. ასევე, ფასადი N12-დან N18 ბურჯის ჩათვლით გაიწმინდება იმ მცენარეებისგან, რომელიც კედელს აზიანებდა. იმავე ბურჯების ფასადი აგურის მასალით აღდგება".

ნარიყალას ციხე ისტორიულ ძეგლთა შორის ერთ-ერთ უძველეს ციხესიმაგრედ არის მიჩნეული.