სტამბოლის ცენტრში მომხდარი ორი აფეთქების შედეგად დაღუპულთა რიცხვი 38-მდე გაიზარდა. BBC-ის ცნობით, მათ შორის 30 პოლიციელია. მანქანა პოლიციის სატვირთოს შეეჯახა და მასში მყოფმა თვითმკვლელმა დეტონატორი აამოქმედა.

შემთხვევა 10 დეკემბერს, გვიან ღამით მოხდა. ერთი აფეთქების ხმა გაისმა ტაქსიმის მოედანთან ახლოს, მეორე კი საფეხბურთო კლუბ ბეშიქთაშის სტადიონის მიმდებარედ, სადაც საფეხბურთო მატჩი ბეშიქთაშსა და ბურსასპორს შორის ახალი დამთავრებული იყო.

საფეხბურთო კლუბ ბეშიქთაშის სტადიონის მიმდებარედ მომხდარი აფეთქება თვითმხილველებმა შორიდან შემთხვევით გადაიღეს. ვიდეო YouTube არხზე Eğlenceli Paylaşımlar გავრცელდა.

BBC თურქეთის ოფიციალურ წყაროებზე დაყრდნობით წერს, რომ ავტომანქანა ორი საათის შემდეგ ააფეთქეს, მას შემდეგ, რაც მაყურებელმა სტადიონი დატოვა.

გამოძიება ეჭვობს, რომ აფეთქება ქურთმა მებრძოლებმა განახორციელეს, თუმცა ჯერჯერობით არცერთ დაჯგუფებას არ აუღია პასუხისმგებლობა მომხდარზე.