ორი წლის წინ, მსოფლიო შვილმკვდარი ვეშაპის გლოვას მთელი მსოფლიო ადევნებდა თვალს. ის მკვდარ ახალშობილს 17 დღის განმავლობაში ატარებდა და მასთან ერთად 1 600 კილომეტრზე მეტი გაიარა.

ახლა ცელნამგალა ვეშაპი, სახელად ტალეკვა, ისევ ორსულადაა. ამის შესახებ მკვლევრებმა დრონით გადაღებული ფოტოებიდან შეიტყვეს. სურათები 2019 წლის სექტემბერში და 2020 წლის ივლისშია გადაღებული.

ცელნამგალა, იგივე მკვლელი ვეშაპების ორსულობა 17-დან 18 თვემდე გრძელდება.

ფოტო: SR3

ვეშაპები სოციალურ ჯგუფებად ცხოვრობენ და წყლის ბინადრების რეაბილიტაციისა და კვლევის ცენტრის ინფორმაციით, სამივე ჯგუფში არიან ორსული ცხოველები. დროში თანხვედრა მეცნიერებისთვის უჩვეულო ფენომენს არ წარმოადგენს, თუმცა, როგორც მკვლევრები ამბობენ, ბოლო პერიოდში, მათი ორსულობა წარუმატებლად სრულდება.

2018 წელს ტალეკვა გარდაცვლილ შვილს კვირების განმავლობაში არ უშვებდა, რომ არ ჩაძირულიყო. ის მკვდარ ახალშობილს წყნარი ოკეანის სანაპიროსთან ატარებდა და მხოლოდ 17 დღის შემდეგ გაუშვა.

ფოტო: Getty Images

2019 წელს მსგავსი ქცევა შენიშნეს დელფინებშიც, როცა ახალი ზელანდიის სანაპიროებთან დედა გარდაცვლილ შვილს დღეების განმავლობაში დაატარებდა და ასე გამოხატავდა გლოვას. ახალი ზელანდიის კონსერვაციის დეპარტამენტი ამბობდა, რომ ზრდასრული ძუძუმწოვრის ქცევა შვილთან ემოციურ მიჯაჭვულობას გამოხატავდა.