ეროვნულ-დემოკრატიული ინსტიტუტის (NDI) კვლევების თანახმად, გამოკითხულთა 53 პროცენტს სჯერა, რომ რწმენა მორწმუნეებს კორონავირუსით დაიფიცირებისგან იცავს. მოსაზრებას, "რწმენა იცავს ჩემი რელიგიის მორწმუნეებს კორონავირუსით დაინფიცირებისგან" მოსახლეობის 38% არ ეთანხმება, ხოლო 9% ამბობს, რომ არ იცის.

აღსანიშნავია ისიც, რომ გამოკითხვების მიხედვით, მართლმადიდებლების მხოლოდ 10%-მა განაცხადა, რომ წელს ეკლესიაში სააღდგომო მსახურებას დაესწრო.

იმ ადამიანების 63%, ვინც თვეში ერთხელ მაინც ესწრებიან რელიგიურ მსახურებას, ეთანხმება მოსაზრებას, რომ რწმენა მორწმუნეებს კორონავირუსით დაინფიცირებისგან იცავს. ამ მოსაზრებას ასეთი ადამიანების 32% არ ეთანხმება.

რაც შეეხება იმ ადამიანებს, ვინც უფრო იშვითად ან არასდროს ესწრებიან რელიგიურ მსახურებას, მათი 49% ეთანხმება მოსახრებას, რომ რწმენა კორონავირუსით დაინფიცირებისგან იცავს. ამ მოსაზრებას ასეთი ადამიანების 41% არ ეთანხმება.

NDI ასევე დაინტერესდა, რას ფიქრობენ ამ მოსაზრებაზე ადამიანები მათი დასახლების, ასაკისა და სქესის მიხედვით:

NDI-მ კვლევისთვის სატელეფონო გამოკითხვა და ფოკუს ჯგუფების მეთოდოლოგია გამოიყენა. სატელეფონო გამოკითხვის შემთხვევაში, საველე სამუშაოები 26-30 ივნისს ჩატარდა და შედგა 1 550 დასრულებული ინტერვიუ. ორგანიზაციის ინფორმაციით, რესპონდენტები შემთხვევით ნომერზე დარეკვის მეთოდით შეირჩა და ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით). გარდა ამისა, კვლევა წარმომადგენლობითია თბილისის, ურბანული და სოფლის ტიპის დასახლებებისთვის. საშუალო ცდომილების ზღვარი +/- 2%-ია, თუმცა იცვლება სხვადასხვა კითხვის მიხედვით.

რაც შეეხება ფოკუს ჯგუფებს, საველე სამუშაოები 24-30 ივნისს, ხუთ ქალაქში ჩატარდა: თბილისი, ზუგდიდი, ბათუმი, მარნეული, ახალქალაქი. თითოეულ ქალაქში 2 ფოკუს ჯგუფი იყო: შერეული ასაკი, სქესი და დასაქმების სტატუსი. მონაწილეები შეარჩიეს ორი მეთოდით: CRRC-ის კოორდინატორები მიდიან ქალაქის რამდენიმე ცენტრალურ ადგილას, შემთხვევითად აჩერებენ ადამიანებს და ჯგუფურ დისკუსიაში მონაწილეობას სთავაზობენ და "თოვლის გუნდის" მეთოდი. ფოკუს ჯგუფში დისკუსიას პროფესიონალი მოდერატორი უძღვებოდა, ღია კითხვებით.