ინფექციური პათოლოგიისა და შიდსის ცენტრმა განცხადება გაავრცელა, სადაც ჯანდაცვის ყოფილ მინისტრს, დავით სერგეენკოს მიმართავს და დაკონკრეტებას სთხოვს, "რა გააკეთა" და "რა გაუფუჭა" სერგეენკომ საყოველთაო ჯანდაცვის პროგრამას.

განცხადების თანახმად, 21 და 26 ივლისს ტელეკომპანია იმედის გადაცემებში, არენა და იმედის კვირა, ჯანდაცვის ყოფილმა მინისტრმა, დავით სერგეენკომ და გადაცემის სხვა მონაწილეებმა სერგეენკოს უდიდეს დამსახურებასა და საყოველთაო ჯანდაცვის C ჰეპატიტის ელიმინაციის სახელმწიფო პროგრამების ინიცირებასა და განხორციელებაზე ისაუბრეს. მათივე თქმით, გადაცემაში სერგეენკომ აღნიშნა, რომ მხოლოდ მინისტრს "მარტო არაფრის გაკეთება არ შეუძლია", ხოლო "გაფუჭება კი ბევრი რამის შეუძლია".

წერილში ნათქვამია, რომ დაბეჯითებით ითხოვენ, დააკონკრეტოს დავით სერგეენკომ კონკრეტულად "რა გაუკეთა" და "რა გაუფუჭა" საყოველთაო ჯანდაცვის პროგრამას. განსაკუთრებით კი, რა დამსახურება აქვს C ჰეპატიტის ელიმინაციის სახელმწიფო პროგრამის ინიცირებასა და განხორციელებაში.

"რატომ მიიყვანა სრულიად გამიზნულად ქვეყნის ერთ-ერთი ყველაზე მნიშვნელოვანი სამედიცინო დაწესებულება — ინფექციური პათოლოგიის, შიდსის და კლინიკური იმუნოლოგიის სამეცნიერო-პრაქტიკული ცენტრი განადგურების პირას და როგორია მისი წვლილი იმაში, რომ ცენტრს, მის პერსონალს და პაციენტებს დღესაც უკიდურესად მძიმე პირობებში უწევთ ყოფნა და რატომ გადაწყვიტა მან ისტორიაში შესვლა "ჰეროსტრატეს" სახელით.
ბ-ნი დავითის პასუხზე იქნება დამოკიდებული ჩვენი შემდგომი ნაბიჯები", — ნათქვამია განცხადებაში.