საქართველოს პრეზიდენტის პოლიტიკური მდივნის განცხადებით, ახალი საკონსტიტუციო კომისიის შექმნის შესახებ, მმართველ გუნდს პრეზიდენტის ადმინისტრაციასთან ოფიციალური კონსულტაციები არ გაუმართავს:

"ოფიციალური კონსულტაციები ნამდვილად არ გამართულა, უკვე გადაწყვეტილების გამოქვეყნებამდე ამ მიღებული გადაწყვეტილების თაობაზე ჩაგვაყენეს საქმის კურსში. ამას, რა თქმა უნდა, კონსულტაცია ვერ დაერქმევა, რადგან ეს იყო მიღებული გადაწყვეტილების გამოცხადებამდე შეტყობინება, მხოლოდ ასე შეგვიძლია დავაფორმულიროთ".

ირაკლი კობახიძის გადაწყვეტილებას ჩიხრაძე ასე აფასებს:

"ძალიან დასანანია ამავდროულად ის, რომ პარლამენტის თავმჯდომარემ, ახალგაზრდა პოლიტიკოსმა, პირველი სერიოზული პოლიტიკური ნაბიჯი გადადგა არა ფართო პოლიტიკურ კონტექსტის გათვალისწინებით, არამედ საკმაოდ ვიწრო, ფორმალისტური მიდგომებიდან გამომდინარე, რაც კიდევ ვიმეორებ, ამ ძალიან მნიშვნელოვან პროცესს სერიოზულად აზარალებს."

"აქ მთავარი ამოცანა იყო, რომ საკონსტიტუციო პროცესი, რომელიც განზრახულია, ყოფილიყო მაღალი სანდოობისა და ლეგიტიმაციის მქონე. აქედან გამომდინარეობდა პრეზიდენტის შეთავაზება ამ პროცესთან დაკავშირებით." - განაცხადა ჩიხრაძემ.

გიორგი მარგველაშვილმა მეცხრე მოწვევის პარლამენტის პირველ სხდომაზე გიორგი კვირიკაშვილს საკონსტიტუციო კომისიის განსხვავებული ფორმატი, პრეზიდენტის, პრემიერ-მინისტრისა და პარლამენტის თანათავმჯდომარეობით შესთავაზა.

22 ნოემბერს, პრეზიდენტის პრესსპიკერმა განაცხადა, რომ მმართველმა გუნდმა მარგველაშვილის შეთავაზებაზე უარი თქვა.

დღეს, 9 დეკემბერს კი ცნობილი გახდა, რომ საკონსტიტუციო კომისიას პარლამენტის თავმჯდომარე უხელმძღვანელებს.