ჯანდაცვის ყოფილი მინისტრი და ქართული ოცნების მაჟორიტარობის კანდიდატი საბურთალოზე, დავით სერგეენკო ამბობს, რომ საბოლოოდ არ არის გადაწყვეტილი, იქნება თუ არა ექსპრემიერი მმართველი პარტიის საარჩევნო სიაში.

"მამუკა ბახტაძესთან დაკავშირებით ჯერ საბოლოო, ფინალური გადაწყვეტილება მიღებული არ არის. მის პოზიციას აქვს მნიშვნელობა, გუნდის პოზიციას აქვს მნიშვნელობა...", — განაცხადა სერგეენკომ პალიტრანიუსის ეთერში.

მან დაადასტურა, რომ ეს საკითხი ჯერ კიდევ განიხილება.

ამასთან, სერგეენკოს თქმით, ქართულ ოცნებას პროპორციულ სიაზე საბოლოო გადაწყვეტილება ჯერ არ მიუღია.

20 ივნისს, ქართული ოცნების მიერ მაჟორიტარების კანდიდატების წარდგენას ყოფილი პრემიერმინისტრი მამუკა ბახტაძე ესწრებოდა. სწორედ ამის შემდეგ გაჩნდა კითხვები მმართველი პარტიის სიაში მის ყოფნასთან დაკავშირებით. პარლამენტის თავმჯდომარემ, არჩილ თალაკვაძემ თქვა, რომ თუ ყოფილი პრემიერმინისტრი, მამუკა ბახტაძე ქართული ოცნების პროპორციულ სიაში შევა, ბევრი მოქალაქე მოხარული იქნება. ქართული ოცნების საარჩევნო შტაბის ხელმძღვანელმა, ირაკლი კობახიძემ კი აღნიშნა, რომ თავად ბახტაძეზეა დამოკიდებული, რამდენად შედის მის ინტერესებში სიაში ყოფნა.