დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ცენტრის ხელმძღვანელის, ამირან გამყრელიძის თქმით, თუ გარდაბნის სოფლებში კორონავირუსის ტესტირებაზე მოსახლეობის დამყოლობა არ იქნება, შესაძლოა, რომ ეს სოფლები ჩაიკეტოს. ამის შესახებ გამყრელიძემ დღეს გამართულ ბრიფინგზე განაცხადა.

გამყრელიძის თქმით, საუბარია გარდაბნის მუნიციპალიტეტში, გაჩიანის დასახლებაზე, რომელშიც სამი სოფელი: ყარაჯალარი, ახთაკლია და ყარათაკლია შედის.

მისივე ინფორმაციით, ამ დასახლებაში ჯამში 34 ინფიცირების შემთხვევაა დაფიქსირებული. როგორც გამყრელიძე ამბობს, დღევანდელი 24 ახალი შემთხვევიდან, 10 ინფიცირების შემთხვევა გაჩიანის კლასტერიდან მოდის.

"სამწუხაროდ, მოსახლეობაში ცუდი დამყოლობაა კვლევებზე, გუშინ დავიწყეთ გაფართოებული კვლევები. ამ სამ სოფელში სულ 7 000 ადამიანი ცხოვრობს და გვინდოდა ამ კვირაში ეს მოსახლეობა სრულად გამოგვეკვლია, რათა ინფექციის გატანის რისკი შეგვემცირებინა. სამწუხაროდ, მოსახლეობიდან შემხვედრი ნაბიჯები არ იდგმება. მიუხედავად იმის, რომ გუშინ ჩვენი 6 ბრიგადა მუშაობდა, 350 ნიმუშზე მეტი ვერ ავიღეთ, როცა 6 ბრიგადის საშუალო სიმძლავრე 700-დან 1000-მდე ნიმუშია", — განაცხადა გამყრელიძემ.

StopCov-ის სტატისტიკით, 22 ივლისისთვის საქართველოში კორონავირუსის 24 ახალი შემთხვევა დადასტურდა. გარდა ამისა, გამოჯანმრთელდა 4 ადამიანი.

თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, 24 ახალი ინიფიცირებულიდან: 5 არის იმპორტირებული შემთხვევა და სატვირთო მანქანების მძღოლები არიან, 5 შემთხვევა დაავადებულებთან კონტაქტებია, 10 შემთხვევა გარდაბნის რაიონის კვლევისას დადასტურდა, 2 პაციენტის ინფიცირების წყარო კი ჯერ უცნობია და კონტაქტების კვლევა მიმდინარეობს.

ბოლო მონაცემებით, ქვეყანაში კორონავირუსის სულ 1073 შემთხვევაა გამოვლენილი, აქედან 907 ადამიანი უკვე გამოჯანმრთელდა, ხოლო 16 გარდაიცვალა. კარანტინის რეჟიმში რჩება 5 692 პირი, სტაციონარში მეთვალყურეობის ქვეშ — 275. უცხოეთიდან საქართველოში სამკურნალოდ 41 ადამიანი გადმოიყვანეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: