მედიაში ინფორმაციის გავრცელების შემდეგ, პროკურატურა განმარტავს, როგორ შეეცვალა ოჯახურ ძალადობაში ბრალდებულ პოლიციის ყოფლ უფროსს, დავით ცინარიძეს აღკვეთის ღონისძიება. შესაბამისი გადაწყვეტილება სასამართლომ 26 ივნისს მიიღო, თუმცა ინფორმაცია მედიაში დღეს გავრცელდა.

პროკურატურის განცხადებით, 26 ივნისს არსებითი განხილვის სხდომაზე, ბრალდების მხარემ მოწმედ დაიბარა დაზარალებული, რომელმაც ჩვენება არ მისცა, რის შემდეგაც დაცვის მხარემ აღკვეთის ღონისძიების შეცვლა მოითხოვა, სასამართლო კი დაეთანხმა.

"დაზარალებულის პოზიციის დაფიქსირების შემდგომ, დაცვის მხარემ სასამართლოს წინაშე დააყენა შუამდგომლობა ბრალდებულ დ.ც.-ს მიმართ აღკვეთის ღონისძიების — პატიმრობის გაუქმების შესახებ და უფრო მსუბუქი აღკვეთის ღონისძიება, გირაოს გამოყენების თაობაზე, რასაც ბრალდების მხარე არ დაეთანხმა. სასამართლომ დააკმაყოფილა დაცვის მხარის შუამდგომლობა და ბრალდებულ დ.ც.-ს აღკვეთის ღონისძიების სახით შეუფარდა გირაო 30000 ლარის ოდენობით", — წერია უწყების განცხადებაში.

უცნობია, როდის გააგრძელებს სასამართლო ცინარიძის ბრალეულობაზე მსჯელობას. სასამართლოში ამბობენ, რომ კოლეგია შვებულებაშია.

გამოძიების ინფორმაციით, მიმდინარე წლის 27 აპრილს ცინარიძემ ცოლს სიტყვიერი და ფიზიკური შეურაცხყოფა მიაყენა, იარაღის გამოყენებით დაემუქრა და ერთხელ გაისროლა კიდეც. ის მეორე დღეს დააკავეს. მის მიმართ მიმართ წარდგენილი ბრალდება სასჯელის სახედ და ზომად ითვალისწინებს თავისუფლების აღკვეთას 3 წლამდე ვადით.

დავით ცინარიძე 2015 წელს საპატრულო პოლიციის დეპარტამენტის უფროსის თანამდებობიდან გაათავისუფლეს და კადრების განყოფილებაში გადაიყვანეს. მანამდე ნაციონალურმა მოძრაობამ გაავრცელა ვიდეოკადრები, სადაც ჩანდა, რომ მოქალაქე ეკა ყუშიტაშვილი დავით ცინარიძის სახელის გამოყენებით პატრულზე ზეწოლას ცდილობდა. ამ ამბის შემდეგ ცინარიძემ სისტემაში მუშაობა გააგრძელა, თუმცა სხვა პოზიციაზე.