"საქართველოში მოახლოვებული საპარლამენტო არჩევნები "გადამწყვეტი" იქნება დემოკრატიისთვის", — ნათქვამია ევროკავშირთან ასოცირების ხელშეკრულების შესრულების ანგარიშში, რომელსაც 13 ივლისს საგარეო კომიტეტმა დაუჭირა მხარი. ამის შესახებ კომიტეტი შემაჯამებელ განცხადებას ავრცელებს.

რეზოლუციაში ევროპარლამენტარები საქართველოს შეახსენებენ, რომ "თანამშრომლობის გაღრმავება და ევროკავშირის დახმარება" რეფორმების გაგრძელებაზეა დამოკიდებული, კერძოდ, დემოკრატიისა და კანონის უზენაესობის, მათ შორის, დამოუკიდებელი მართლმსაჯულების, საარჩევნო სისტემის რეფორმისა და ინსტიტუციებში კონტროლისა და ბალანსის მექანიზმზე.

"ევროდეპუტატები მიესალმებიან ევროკავშირი-საქართველოს ურთიერთობების გაღრმავებას, აცნობიერებენ ქვეყნის ბოლოდროინდელ პროგრესს, რეფორმების განხორციელებისას", — წერია კომიტეტის განცხადებაში.

ანგარიშში ევროპარლამენტარები, ასევე, პოზიტიურად აფასებენ კორონავირუსის პანდემიის დროს საქართველოში სამედიცინო სფეროს წარმომადგენლებისა და ხელისუფლების ეფექტიან მუშაობას.

საქართველოს მიერ ასოცირების ხელშეკრულების შესრულების ანგარიშში შეტანილ შესწორებებში, სხვა საკითხებთან ერთად, საუბარია 8 მარტის შეთანხმების სრულად შესრულებაზე, მედიის თავისუფლების მნიშვნელობასა და გიორგი რურუას გათავისუფლებაზე.

ანგარიშის 66-ე შესწორებაში, ევროპარლამენტარები, ანდრიუს კუბილიუსი, რასა იუკნევიანე, სანდრა კალნიეტე და მირიამ ლექსმანი ხაზს უსვამენ მედიის თავისუფლების მნიშვნელობას, რაც უნდა ითვალისწინებდეს ყველა პოლიტიკური პარტიისთვის თანაბარ წვდომას მედიაზე წინასაარჩევნო კამპანიის დროს, ასევე, პლურალისტურ და არადისკრიმანაციულ გაშუქებას საზოგადოებრივ და კერძო მაუწყებლებისთვის. ამავე შესწორებაში ხაზგასმულია დამოუკიდებელი, პლურალისტური მედიალანდშაფტი, რომელიც თავისუფალი იქნება მთავრობის ან სხვა სახის ჩარევისაგან:

"გამოვხატავთ ღრმა შეშფოთებას, რომ მთავრობის მიმართ კრიტიკულად განწყობილ მედიასაშუალებებზე არის ზეწოლა, კერძოს მათი მფლობელების მიმართ წარმოებულია სისხლის სამართლის საქმეები (ნიკა გვარამია, მთავარი არხი), დაკავებულია არხის თანამფლობელიც, გიორგი რურუა; ფულის გათეთრების საქმეში ბრალდებულია TV პირველის მფლობელის მამა, ავთანდილ წერეთელი; გათავისუფლებული ან გადაყენებულები არიან კრიტიკული ჟურნალისტები აჭარის საზოგადოებრივი მაუწყებლიდან".

ანგარიში ევროპარლამენტის საგარეო ურთიერთობათა კომიტეტმა მოამზადა და სრულად ევროპარლამენტის პლენარულ სესიაზე, სექტემბერში უყრიან კენჭს.