შობა-ახალ წელს თუ სულმოუთქმელად ელით და ყველაზე მეტად სანტას გამოჩენა გახარებთ, მაშინ Google-ს სიახლეც მოგეწონებათ. სურვილების ამხდენმა კომპანიამ ვირტუალური ლაპლანდია შექმნა.

სანტას ვიზიტამდე დღეების ათვლა უკვე დაწყებულია, მანამდე კი შეგიძლიათ თავი სხვადასხვა თამაშით შეიქციოთ: აცეკვოთ ელფები ან პინგვინებს საშობაო საჩუქრების შეგროვებაში დაეხმაროთ. ასევე, გაეცნოთ საშობაო და საახალწლო ტრადიციებს მსოფლიოს სხვადასხვა ქვეყნიდან.

გარდა თამაშისა, ამ რესურსებით პროგრამირების შესწავლაც შეიძლება. ყოველი დავალების შესრულებისას შეგიძლია ნახოთ, რა პროგრამული კოდით ხდება სხვადასხვა მოქმედებები.

მაგალითად, თამაშში Code Lab თქვენი მოქმედებები ისე უნდა დააპროგრამოთ, რომ სანტა საჩუქრამდე მივიდეს.

ფოტო: Google

მარცხენა ველში არსებული ისრების გადატანა-შეერთება სანტას მიმართულებას განსაზღვრავს.

ფოტო: Google

Play-ზე დაჭერის შემდეგ ნახავთ, სწორად მიდის თუ არა სანტა და რაიმე შეცდომა ხომ არ დაუშვით. თუ ყველაფერს სწორად გააკეთებთ, მაშინ სანტა საჩუქარს აიღებს და მის შექებასაც დაიმსახურებთ. ყოველი ეტაპის დასრულების შემდეგ საშუალება გექნებათ ნახოთ ის კოდი, რომელმაც სანტა აქეთ-იქით ატარა:

ფოტო: Google

ასეთი სასწავლო თამაშები Learn კატეგორიის ქვეშ შეგიძლიათ იპოვოთ.

ახალ-ახალი თამაშები და ინტერაქტიული პროგრამები სოფელს ყოველდღე ემატება.