დამოუკიდებელი ექსპერტი, ალექსანდრე გეჯაძე აცხადებს, რომ დამატებითი, კოსმიური ექსპერტიზაა საჭირო იმისთვის, რათა გაირკვეს რით მიაყენეს გიორგი შაქარაშვილის დაზიანებები. გეჯაძე ექსპერტიზაში გარდაცვლილის ოჯახმა ჩართო.

დღეს პროკურატურამ გიორგი შაქარაშვილის ექსპერტიზა გაასაჯაროვა, სადაც საუბარია, რომ შაქარაშვილის სიკვდილის მიზეზია ასფიქსია წყალში დახრჩობით. ამავე დროს, საუბარია, რომ მან სიცოცხლის დროს მკვირი-ბლაგვი საგნით გარკვეული დაზიანებები მიიღო.

გეჯაძის თქმით, სახის არეში და მუცლისა და მენჯის ქვემო ნახევრის პროექციაში ძლიერ ზემოქმედებას ჰქონდა ადგილი, რამაც სისხლჩაქცევები გამოიწვია.

"როგორც სხეულის წინა მარცხენა მხარეს, ასევე, წელის არეში მიყენებული არაერთი დაზიანება, საკმაოდ ძალის ზემოქმედებით, რამაც გამოიწვია სისხლჩაქცევები. ცალსახად ვადასტურებ, რომ ეს სისხლჩაქცევები როგორც მცირე მენჯის წინა კედელზე, ისე რეტროპერიტონიალურად მუშტის დარტყმით ვერ განვითარდებოდა, მას სჭირდებოდა საკმაოდ ძალის ზემოქმედება", — ამბობს გეჯაძე.

მისივე თქმით, თუ რომელი დაზიანება რა საგნით იქნა მიყენებული, ეს კომისიურმა ექსპერტიზამ საქმის მასალებზე დაყრდნობით უნდა დაადგინოს:

"მკვრივ-ბლაგვი საგნის მატრავმირებელი საგნის იდენტიფიკაცია შესაძლებელია მხოლოდ იმ შემთხვევაში თუ ის დატოვებს გარკვეულ რელიეფს კანზე".

ამასთან, ექსპერტი გამორიცხავს, რომ თუ შაქარაშვილმა დაზიანებები ცემის დროს მიიღო, ისინი ერთ ადამიანს მიეყენებინა.

19 წლის ფეხბურთელი, გიორგი შაქარაშვილი 19 ივნისს დაიკარგა. დადგინდა, რომ ის მცხეთაში, დაბადების დღეზე იმყოფებოდა, სადაც ახალგაზრდებს შორის დაპირისპირება მოხდა. ამის შემდეგ ერთმა ჯგუფმა თბილისიდან "დახმარება გამოიძახა". შაქარაშვილი და კიდევ 5 ადამიანი აგარაკიდან მათ მოსვლამდე წამოვიდა. პროკურატურის მიერ გავრცელებულ კადრებში ჩანს, რომ უკვე არაგვის ხიდთან მყოფ ახალგაზრდებს მანქანიდან გადმოსული ადამიანები თავს დაესხნენ, რის შემდეგაც შაქარაშვილი და მასთან ერთად მყოფი პირები გაიქცნენ. ფეხბურთელის კვალი აქედან იკარგება, მასთან ერთად მყოფი 5 ადამიანი კი თბილისში ცალ-ცალკე, სხვადასხვა დროს დაბრუნდა.

4-დღიანი ძებნის შემდეგ, 22 ივნისს, გიორგი შაქარაშვილი ცხედარი მდინარე არაგვში იპოვეს. რამდენიმე დღეში საქმეზე 17 ადამიანი დააკავეს, ყველა მათგან წინასწარი პატიმრობა აქვს შეფარდებული. თავდაპირველად, მათ ბრალი ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის ფაქტებზე აქვთ წარდგენილი. როგორც ექსპერტიზის დასკვნის შემდეგ უწყებაში განაცხადეს, საქმეზე კვალიფიკაცია დაზუსტდა და ამ საქმეზე გამოძიება დამამძიმებელ გარემოებებში ჯგუფურად განხორციელებული განზრახ მკვლელობის მუხლით გაგრძელდება.