გერმანიიდან სასჯელაღსრულების დეპარტამენტის ყოფილი უფროსის, დავით ჭაკუას ექსტრადირება განხორციელდა. ინფორმაცია ამის შესახებ უწყებამ გაავრცელა.

პროკურატურის განცხადებით, ჭაკუას ქართული მხარისთვის გადმოცემის თაობაზე შუამდგომლობით გერმანიას 2019 წლის 20 დეკემბერს მიმართეს. მათი თქმით, ექსტრადიციის საკითხის განხილვის მთელი პროცესის განმავლობაში დავით ჭაკუა დავობდა, რომ საქართველოში ექსტრადიციის შემთხვევაში იგი დაექვემდებარებოდა პოლიტიკური ნიშნით დევნას და არსებობდა მისი უფლებების დარღვევის რეალური საშიშროება.

გენერალური პროკურატურის ჭაკუას რამდენიმე მძიმე დანაშაულის ბრალდებით ეძებდა. კერძოდ: პატიმართა მიმართ დამამძიმებელ გარემოებებში ჩადენილი დამამცირებელი და არაადამიანური მოპყრობის, იგივე დანაშაულების წაქეზების, დამამძიმებელ გარემოებებში ჩადენილი სამსახურებრივი უფლებამოსილების ბოროტად გამოყენების, სისხლის სამართლის საქმეზე მტკიცებულების ფალსიფიკაციის, დანაშაულთა პროვოკაციის წაქეზების და მოწმეზე ზემოქმედების განხორციელების ბრალდებით. უწყების განმარტებით, ხსენებული დანაშაულები დაკავშირებულია ე.წ. 2006 წლის ციხის ბუნტისა და 2012 წლის ციხის კადრების საქმეებთან.

ციხის ბუნტის საქმეზე დავით ჭაკუას დაუსწრებლად მისჯილი აქვს 3 წლისა და 9 თვის ვადით თავისუფლების აღკვეთა, ჯარიმა და ასევე ჩამორთმეული აქვს სახელმწიფო სამსახურში დანიშვნითი თანამდებობის დაკავების უფლება. რაც შეეხება ციხის კადრების საქმეს, ამ ეტაპზე სასამართლო განხილვის სტადიაზეა.