სურსათის ეროვნული სააგენტოს თბილისის საქალაქო სამსახურის უფროსი ინსპექტორი ქრთამის აღების ბრალდებით დააკავეს. ამის შესახებ ინფორმაციას ფინანსთა სამინისტროს საგამოძიებო სამსახური ავრცელებს.

მათი ცნობით, ბრალდებული 10 ათასი ლარის სანაცვლოდ თბილისის ერთ-ერთი კაფე-ბარის მფლობელს დაპირდა, რომ ობიექტს არ შეამოწმებდა, შემოწმების შემთხვევაში კი მას წინასწარ გააფრთხილებდა.

"აღნიშნული დანაშაულებრივი განზრახვით, ბრალდებულმა, კაფე-ბარის მფლობელს წინასწარ მოსთხოვა და გამოართვა 10 000 ლარი, რა დროსაც მოხდა მისი დაკავება", — ნათქვამია საგამოძიებო სამსახურის ინფორმაციაში.

მათივე ინფორმაციით, საქმეზე გამოძიება საქართველოს სისხლის სამართლის კოდექსის 338-ე მუხლის პირველი ნაწილით მიმდინარეობს, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს.