აშშ-ს ელჩის მოადგილე, ელიზაბეთ რუდი საქართველოში დიპლომატიურ მისიას ასრულებს და ამის აღსანიშნად ვიდეომიმართვას ქართულ ენაზე ავრცელებს. იგი მადლობას უხდის თითოეულ ქართველს, ვინც ბოლო სამი წლის განმავლობაში მასთან ითანამშრომლა და მას უმასპინძლა. ელიზაბეთ რუდის თქმით, საქართველოს ყოველთვის განსაკუთრებული ადგილი ექნება მის გულში.

"ჩემთვის განსაკუთრებით დიდი პატივი იყო, ვყოფილიყავი აშშ-ს წარმომადგენელი საქართველში და ერთობლივად გვემუშავა საქართველოს ეკონომიკის გაძლიერების, დემოკრატიის ამაღლებისა და მისი ტერიტორიული მთლიანობის დაცვის კუთხით.

ბოლო რამდენიმე თვის განმავლობაში, ჩვენ ერთობლივი ძალისხმევა გავწიეთ ახალ გამოწვევასთან, Covid-19-თან გასამკლავებლად. საქართველოს რეაგირება პანდემიასთან შთამბეჭდავია და აშშ გააგრძელებს საქართველოს ეკონომიკის გაჯანსაღების მხარდაჭერას მომდევნო თვეების განმავლობაში.

ძალისხმევა არ დავიშურე რომ საქართველოს თითოეული კუთხე არ მენახა. გამაოცა საქართველოს მთების, ტყეებისა და მდინარეების სილამაზემ. ვნახე მზის ჩასვლა შავი ზღვის სანაპიროზე ბათუმში და მოვისმინე ბულბულის გალობა ვაშლოვანის მთებში.მე შემიყვარდა უძველესი მელოდიები, რომლებიც საქართველოს ტრადიციების სიმბოლოა და ახალი სიმღერები, რომლებიც მის ენერგიულ აწმყოს განასახიერებს. ყველაზე მეტად მემახსოვრება ქართველი ხალხის სითბო და სიკეთე. საქართველოს ყოველთვის ექნება განსაკუთრებული ადგილი ჩემს გულში. გულწრფელად გისურვებთ ჯანმრთელობას, ერთიანობას და დემოკრატიულ მომავალს", — ამბობს ელიზაბეთ რუდი.