8 მარტის შეთანხმების სრულად შესრულების მოთხოვნით პარლამენტთან საპროტესტო აქცია მიმდინარეობს. აქციაზე შეკრებილები აცხადებენ, რომ გიორგი რურუა პოლიტიკური ნიშნითაა დაკავებული და ის პატიმრობიდან უნდა გათავისუფლდეს. ამასთან, ისინი ითხოვენ, რომ ქართულმა ოცნებამ საკონსტიტუციო ცვლილებები არ ჩააგდოს და საარჩევნო სისტემის ცვლილებას მხარი არ დაუჭიროს.

პარლამენტის წინ აქციაზე სირცვილიას, რუსეთის ოკუპანტიასა და შეცვალეს აქტივისტები არიან. ამასთან, ადგილზე რურუას მეგობრებიც არიან მისულები. აქციაზე ხმის გამაძლიერებლებიდან ისმის ქართული ოცნების თავმჯდომარის, ბიძინა ივანიშვილის ცნობილი სიტყვები: "შეიძლება მართლაც ევროპაც გავაოცო, ისეთი დემოკრატია შევქმნა საქართველოში".

დღეს, 29 ივნისს გიორგი რურუას სასამართლო პროცესი მიმდინარეობს. ამასთან, 12 საათზე პარლამენტში საკონსტიტუციო ცვლილებებზე მესამე კენჭისყრა უნდა ჩატარდეს. იმ შემთხვევაში თუ ცვლილებებს სულ მცირე 113 დეპუტატი დაუჭერს მხარს, 2020 წლის საპარლამენტო არჩევნები 120/30 პრინციპით ჩატარდება.

როგორც ცნობილია, ნაციონალური მოძრაობა და ევროპული საქართველო რურუას გათავისუფლების გარეშე კენჭისყრაში მონაწილეობას არ მიიღებენ.