ხვალ, 29 ივნისს, 11 საათზე მოძრაობა სირცხვილია და რუსეთი ოკუპანტია პარლამენტთან აქციას გამართავენ და საარჩევნო სისტემის კენჭისყრის დაწყებამდე, მოუწოდებენ ქართულ ოცნებას, შეასრულოს 8 მარტის შეთანხმების ორივე ნაწილი.

"2020 წლის 8 მარტს, დასავლელი პარტნიორების ფასილიტაციით, ხელისუფლებასა და ოპოზიციას შორის შედგა ორპუნქტიანი შეთანხმება:

  1. უნდა შეცვლილიყო არსებული შერეული საარჩევნო სისტემა პროპორციულთან მიახლოებული 120/30-ზე სისტემით;
  2. უნდა გათავისუფლებულიყო პოლიტპატიმარი გიორგი რურუა.

ჯერ-ჯერობით, შეთანხმების არცერთი პუნქტი ბოლომდე შესრულებული არ არის. მიუხედავად იმისა, რომ ჩვენი დასავლელი პარტნიორები აქტიურად მოითხოვენ ხელისუფლებისგან შეთანხმების სრულად შესრულებას, ქართული ოცნების მთავრობა ნაკისრი ვალდებულებების შესრულებას არ გეგმავს", — წერია მათ განცხადებაში.

8 მარტის შეთანხმება საარჩევნო სისტემასთან დაკავშირებით საკონსტიტუციო ცვლილებებზე კონსენსუს და მართმსაჯულების სისტემას ეხებოდა. ცვლილებების თანახმად, არსებული საარჩევნო სისტემა უნდა შეიცვალოს და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება.

ოპოზიცია აცხადებს, რომ შეთანხმების ნაწილი იყო პოლიტპატიმრების გათავისუფლება, რასაც მმართველი გუნდი უარყოფს. 2 პოლიტიკოსი გიგი უგულავა და ირაკლი ოქრუაშვილი პრეზიდენტმა შეიწყალა, მაგრამ პატიმრობაში რჩება მთავარი არხის მეწილე გიორგი რურუა, რის გამოც ოპოზიცია კენჭისყრაში არ მონაწილეობს.

არსებულ ცვლილებებს ორი მოსმენით უკვე დაუჭირეს მხარი. ნაციონალურმა მოძრაობამ არც ერთ კენჭისყრაში არ მიიღო მონაწილეობა, რის მიზეზადაც რურუას პატიმრობა დაასახელა. პირველ მოსმენაში პროექტს მხარი დაუჭირა ევროპულმა საქართველომ, თუმცა რურუას მიზეზით მესამე მოსმენაზე არ მივიდა.

იმისთვის, რომ საკონსტიტუციო ცვლილებები ძალაში შევიდეს, მესამე მოსმენით მხარდაჭერაა საჭირო. კენჭისყრა ხვალ, 29 ივნისს რიგგარეშე სხდომაზე გაიმართება.