ქართული ოცნების დეპუტატი, დავით მათიკაშვილი ბერა ივანიშვილზე წერს, რომ "საამაყო მამის საამაყო შვილია" მასზე მომზადებული სიუჟეტის გამო კი, ჟურნალისტებს შეურაცხმყოფელად მოიხსენებს და "პოლიტიკურად მეძავებს" უწოდებს. ამ შინაარსის სტატუსი მან ფეისბუქზე გამოაქვეყნა.

"ბერა ივანიშვილი დღეს მტერია მათი, "მტრობა" წესიერებით და გამორჩეული ადამიანობით დაიმსახურა, და კიდევ იმით რომ ნაც ხროვის დამარცხებაში მამას და მთელ ქართველ ხალხს გვერდით ედგა 2012 წელს! ბერა, საამაყო შვილია საამაყო მამის, აი ამას ვერ იტანენ ეშმაკისეული პოლიტიკანები და პოლიტიკურად "მეძავი" ვაი ჟურნალისტები!
გრცხვენოდეთ და მშვიდად დაელოდეთ თქვენს პოლიტიკურ აღსასრულს! არც ისე შორსაა 31 ოქტომბერი!!!!!" — წერს დავით მათიკაშვილი.

მათიკაშვილი აცხადებს, რომ პოლიტიკოსები და მათი "სამეტყველო აპარატები" ნაციონალური მოძრაობის შექმნის დღიდან სიბოროტეს და ცილისწამებას აფრქვევენ. ამ სტატუსით დეპუტატი მთავარი არხის სიუჟეტს გამოეხმაურა, რომელშიც საუბარია იმაზე, რომ 19 წლის ფეხბურთელის საქმესთან, შესაძლოა, ბერა ივანიშვილის ახლო მეგობარს ჰქონდეს კავშირი.

მთავარი არხის ამ სიუჟეტზე პოსტი ქართული ოცნების გენერალურმა მდივანმა და თბილისის მერმა, კახა კალაძემაც გამოაქვეყნა. ის ამტკიცებს, რომ სიუჟეტი დეზინფორმაციულია და "დეზინფორმაციაზე აღარ უნდა გაჩუმდნენ, რადგან ტყუილი ბოროტებას ასაზრდოებს".

მთავარმა არხმა ფეხბურთელ გიორგი შაქარაშვილის გარდაცვალებასთან დაკავშირებით სიუჟეტში მოამზადა, სადაც საუბარია, რომ ე.წ. კანონიერი ქურდის, კაკო ბილანიშვილის შვილი — ავთო ბილანიშვილი "ნახალოვკის დაჯგუფებას" აკონტროლებს. მთავარი არხის ინფორმაციით, ბილანიშვილი ბერა ივანიშვილის ახლო მეგობარია. სიუჟეტში გამოთქმულია ეჭვი, რომ შესაძლოა ეს იყოს მიზეზი, რაც საქმის გამოძიებაზე გავლენას ახდენს და რის გამოც სამართალდამცავებმა ქმედითი ნაბიჯები მანამ არ გადადგეს, სანამ დეტალებმა არ "გაჟონა".