მმართველი გუნდის დეპუტატი ირაკლი კობახიძე ფიქრობს, რომ თბილისის მერის, კახა კალაძის კამპანია კრიტიკული მედიების წინააღმდეგ, რომელსაც ის ფეიქნიუსებთან ბრძოლას ეძახის, კარგი და დროული ინიციატივაა.

"ფეიქნიუსი არ არის მხოლოდ საქართველოს პრობლემა, ეს არის გლობალური პრობლემა და ჩვენ ყველამ ჩვენი პატარა წვლილი უნდა შევიტანოთ ამ გლობალური და ლოკალური პრობლემის წინააღმდეგ", — განაცხადა მან.

მან მოუწოდა მედიას, რომ ყველა ერთად "არ დავიდეს გვარამიას და მელაძის დონეზე", რადგან მისი აზრით, ამის იქეთ "ფსკერი არ არსებობს".

25 ივნისს თბილისის მერმა განაცხადა, რომ ფეიქნიუსის წინააღმდეგ ვიდეოჩართვებს იწყებს. მისი თქმით, ყველას, ვინც მერიისა და მის წინააღმდეგ ცრუ ინფორმაციას ავრცელებს, "ცხვირ-პირში სიმართლის მუშტი მოხვდებათ".

როგორც კალაძე ამბობს, რადგან არჩევნები ახლოვდება, პოლიტიკოსებსა და მედიასაშუალებებში ცრუ და ცილისმწამებლური ინფორმაციის გავრცელებამ იმატა და სწორედ ამიტომ, აპირებს, რომ მათ "არგუმენტირებულად" და "რაციონალურად" უპასუხოს. მისი თქმით, ვიდეოჩართვებში მოსახლეობას აჩვენებენ, თუ როგორ ცდილობენ კონკრეტული მედიასაშუალებები საზოგადოების სიცრუეში შეყვანას.