სახალხო დამცველი, ნინო ლომჯარია ფეიქნიუსთან ბრძოლასთან დაკავშირებით თბილისის მერის, კახა კალაძის მიერ გამოქვეყნებულ ბანერს გამოეხმაურა. ლომჯარია ამბობს, რომ შთაბეჭდილება რჩება, რომ მიზანი კონკრეტული მედიასაშუალებების წინააღმდეგ განცხადებების გაკეთებაა.

"ეს ბანერი მიჩენს შთაბეჭდილებას, რომ მიზანია კონკრეტული მედიასაშუალებების წინააღმდეგ განცხადებების გაკეთება და არა ყალბ ახალ ამბებთან ბრძოლა", — აღნიშნა ომბუდსმენმა.

გუშინ, 25 ივნისს თბილისის მერმა განაცხადა, რომ ფეიქნიუსის წინააღმდეგ ვიდეოჩართვებს იწყებს. მისი თქმით, ყველას, ვინც მერიისა და მის წინააღმდეგ ცრუ ინფორმაციას ავრცელებს, "ცხვირ-პირში სიმართლის მუშტი მოხვდებათ".

როგორც კალაძე ამბობს, რადგან არჩევნები ახლოვდება, პოლიტიკოსებსა და მედიასაშუალებებში ცრუ და ცილისმწამებლური ინფორმაციის გავრცელებამ იმატა და სწორედ ამიტომ, აპირებს, რომ მათ "არგუმენტირებულად" და "რაციონალურად" უპასუხოს. მისი თქმით, ვიდეოჩართვებში მოსახლეობას აჩვენებენ, თუ როგორ ცდილობენ კონკრეტული მედიასაშუალებები საზოგადოების სიცრუეში შეყვანას.

სწორედ ამასთან დაკავშირებით კალაძემ თავის ფეისბუქგვერდზე პირდაპირი ჩართვა დააანონსა. ბანერზე კი მას სამი ტელევიზია მთავარი არხი, ფორმულა და TV პირველი არიან გამოსახული.

თბილისის მერი კახა კალაძე ამბობს, რომ ფეისბუქში გამოქვეყნებულ ანონსში ლოგოები არა სისხლში "არამედ ტყუილებშია ჩაღვენთილი".

"ეს არ არის ჩვენი მხრიდან უხეში სახით… უბრალოდ თქვენივე გაკეთებულ სიუჟეტებზე ჩვენი მხრიდან იქნება ფაქტებით, არგუმენტებით დასაბუთებული პასუხები. სისხლი არაფერ შუაში არ არის გითხარით, ეს არის ტყუილებში ჩაღვენთილი ლოგოები. როდესაც ჩვენ კომენტარებს ვაკეთებთ და თქვენ ცდილობთ, რომ ეს კომენტარები არ გაუშვათ, ან მიჭრილ-მოჭრილი გაუშვათ… ამიტომ საზოგადოება შეცდომაში რომ არ შევიდეს, კარგი იქნება ჩვენი მხრიდან ყველა თქვენს, რომ თქვენ მიერ გაჟღერებულ სიუჟეტზე იყოს არგუმენტირებული, დასაბუთებული პასუხები, რათა მოსახლეობამ თავად გააკეთოს ანალიზი კონკრეტულ თემებზე", — აღნიშნა კალაძემ.