ევროპარლამენტარი, ანდრიუს კუბილიუსი იმედს გამოთქვამს, რომ საკონსტიტუციო ცვლილებების შემდეგ მოსმენებში ყველა ოპოზიციური პარტია შეძლებს მონაწილეობას. ამ თემაზე პოსტი მან საკუთარ ტვიტერზე გამოაქვეყნა.

"მივესალმებით პირველ მოსმენას საქართველოში საარჩევნო რეფორმასთან დაკავშირებით, 136 ხმით. იმედი მაქვს, რომ 8 მარტის შეთანხმება სრულად განხორციელდება და ყველა ოპოზიციურ პარტიას შეეძლება მონაწილეობა მიიღონ შემდგომ მოსმენებში. ეს არის დემოკრატიის მომწიფების გზა პოლიტპატიმრების გარეშე!" — წერს ანდრიუს კუბილიუსი.

საქართველოს პარლამენტმა საკონსტიტუციო ცვლილებებს პირველი მოსმენით მხარი დაუჭირა. ცვლილებების თანახმად, არსებული საარჩევნო სისტემა უნდა შეიცვალოს და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება. ცვლილებებს მხარი 136-მა დეპუტატმა დაუჭირა, 5-მა წინააღმდეგ მისცა ხმა.

ცვლილებებს მხარი დაუჭირა ევროპული საქართველომაც. დავით ბაქრაძის განცხადებით, პარტიამ ეს გადაწყვეტილება მიიღო, რათა ქართულ ოცნებას არ ჰქონდეს შესაძლებლობა, საარჩევნო სისტემის ცვლილებები კვლავ ჩააგდოს. მისივე თქმით, ასე დარჩება მეტი დრო იმისთვის, რომ შეთანხმება შესრულდეს "პოლიტიკური დევნის" ნაწილში და იმისთვის, რომ პროკურატურამ მიიღოს გადაწყვეტილება გიორგი რურუას გათავისუფლებასთან დაკავშირებით.

კენჭირსყრის დაწყებამდე ცნობილი გახდა, რომ ცვლილებებს მხარს არ დაუჭრდნენ: ემზარ კვიციანი, ნატო ჩხეიძე, ბიძინა გეგიძე, დავით ჭიჭინაძე და ალექსანდრე ერქვანია. კენჭისყრაში მონაწილეობა არ მიუღია ნაციონალურ მოძრაობასაც. ასევე, ცნობილი იყო, რომ უმრავლესობის მაჟორიტარი დეპუტატი, კახა ოქრიაშვილი ცვლილებებს მხარს არ დაუჭერდა.