"მიიღე მეტი ცოდნა ფინანსების მართვის შესახებ" - საქართველოს პრეზიდენტის სარეზერვო ფონდი უფროსკლასელებისთვის ფინანსურ და სამეწარმეო განათლების მიღებას დააფინანსებს. პროექტის მონაწილე 1000 მოსწავლე ბიზნესისა და ტექნოლოგიების უნივერსიტეტში მოისმენს ლექციას თემაზე "ფული, ფინანსები და მათი გავლენა ეკონომიკაზე".

პრეზიდენტის პრესსამსახურის ცნობით, პროექტი თბილისისა და რეგიონების უფროსკლასელებში ფინანსური და სამეწარმეო განათლების გავრცელებას და ფინანსური განათლების შესახებ ცნობიერების ამაღლებას ისახავს მიზანდ.

თანამშრომლობის შესახებ მემორანდუმს საქართველოს პრეზიდენტის ადმინისტრაციის უფროსმა გიორგი აბაშიშვილმა, ეროვნული ბანკის პრეზიდენტმა კობა გვენეტაძემ და ბიზნესისა და ტექნოლოგიების უნივერსიტეტის რექტორმა, მიხეილ ბატიაშვილმა დღეს მოაწერეს ხელი.

გიორგი აბაშიშვილის თქმით, პრეზიდენტის სარეზერვო ფონდი დიდ მნიშვნელობას ანიჭებს და დიდ ყურადღებას უთმობს განათლების სფეროს განვითარების საკითხებს და ამ კონკრეტულ შემთხვევაში კი, ფინანსური და სამეწარმეო განათლების გავრცელებას.