იუსტიციის უმაღლესი საბჭოს არამოსამართლე წევრი, ანა დოლიძე პრეზიდენტის განცხადებას ეხმაურება, სადაც სალომე ზურაბიშვილმა თქვა, რომ კონსტიტუცია დოლიძის გათავისუფლების საშუალებას არ აძლევს, თუმცა იმედი გამოთქვა, რომ ის თავად მიიღებს დროულ და ღირსეულ გადაწყუვეტილებას.

ანა დოლიძემ დღეს მედიასთან განაცხადა, რომ ზურაბიშვილი ორი წლის განმავლობაში სასამართლოში ე.წ. კლანთან დაკავშირებით განცხადება არ გაუკეთებია, ახლა კი მოვლენებს უსწრაფესად გამოეხმაურა, რაც აფიქრებინებს, რომ ქართული ოცნების მიერ შექმნილ დღის წესრიგს მიჰყვება.

მიუხედავად ალეკო ელისაშვილთან და ლევან კობერიძესთან ერთად პოლიტიკური პლატფორმის შექმნისა, ანა დოლიძე ამბობს, რომ საბჭოსთან მიმართებაში შესაბამის გადაწყვეტილებას მაშინ მიიღებს, როცა პოლიტიკურ საქმიანობას გადაწყვეტს.

"არაერთხელ მქონდა მეც და არაერთ სუბიექტს მიმართვა სალომე ზურაბიშვილისადმი, რომ რამე ეთქვა კლანთან მიმართებაში და სასამართლოში მიმდინარე პროცესებთან მიმართებაში. [...] სალომე ზურაბიშვილის მხრიდან ორწლიანი დუმილი, როდესაც თითქმის ყოველ დღე ტელევიზორში მიდიოდა ლანძღვა, დაცინვა, თავდასხმა... ფიზიკურ შეხებამდეც მივიდა საქმე იუსტიციის საბჭოში არაერთხელ. არც ერთხელ არ გამოუვლენია არც სახელმწიფოებრივი პოზიცია, რა ხდება სასამართლოში, არც ქალური სოლიდარობა და არც ადამიანური გვერდში დგომა. ამ პირობებში მისი უსწრაფესი გამოხმაურება ამ თემისადმი მიანიშნებს, რომ ეს არის ქართული ოცნების მიერ წინასწარ შექმნილი დღის წესრიგი, რომელსაც ხშირად მხარს უბამს ნაციონალური მოძრაობა, რომ მაქსიმალურად დაზიანდნენ ადამიანები, ვისაც შეუძლია ეს ორმეფობის დღის წესრიგი შეცვალოს. [...] როდესაც მე მივიღებ პოლიტიკური ანუ პარტიული, საარჩევნო საქმიანობის გადაწყვეტილებას, ჩემი დღის წესრიგით, შესაბამისად ვიმოქმედებ იუსტიციის საბჭოსთან მიმართებაში", — თქვა მან.

პრეზიდენტმა ანა დოლიძესთან დაკავშირებით განცხადება 19 ივნისს გაავრცელა. სალომე ზურაბიშვილი ამბობს, რომ კანონით პრეზიდენტის მიერ იუსტიციის უმაღლესი საბჭოს წევრის უფლებამოსილების შეწყვეტა გათვალისწინებულია, თუმცა კონსტიტუციით — არა. პრეზიდენტის თქმით, ელოდება, რომ "ქალბატონი ანა დოლიძე მიიღებს დროულ და ღირსეულ გადაწყვეტილებას".

იუსტიციის უმაღლესი საბჭოს არამოსამართლე წევრმა, ანა დოლიძემ პოლიტიკური პლატფორმა შექმნა. ის პარლამენტის დამოუკიდებელ დეპუტატ ლევან კობერიძესთან, ალეკო ელისაშვილთან და მის თანაგუნდელ ლევან იოსელიანთან გაერთიანდა.

იუსტიციის საბჭოს არამოსამართლე წევრი, ნაზი ჯანეზაშვილი ამბობს, რომ ეს უკანონოა. მისი აზრით, ანა დოლიძე დღესაც რომ გადადგეს იუსტიციის საბჭოს წევრის თანამდებობიდან, კანონი უკვე დარღვეული აქვს.

გარდა ამისა, არასამთავრობო ორგანიზაციების პოზიციაცაა, რომ დოლიძის მიერ სამოქალაქო მოძრაობის დაფუძნება მის მიერ ამჟამად დაკავებულ თანამდებობასთან შეუთავსებელია. ამასთან დაკავშირებით რამდენიმე ორგანიზაცია ერთობლივ განცხადებას ავრცელებს და დოლიძეს მოუწოდებს, რომ თუ ის უახლოეს მომავალში პოლიტიკურ საქმიანობას აპირებს, გადაწყვეტილება თანამდებობის დატოვების შესახებ თავად და დროულად მიიღოს.