აუდიტორია 115-ის წევრმა, თეო მეტრეველმა On.ge-ს უთხრა, რომ 5 დეკემბრამდე მოძრაობა არაფრის შეცვლას არ გეგმავს, თუმცა შემდგომ მოქმედებებსა და გეგმებზე საუბარი უჭირს.

მოძრაობის წევრის ცნობით, 5 დეკემბერს განათლების, მეცნიერებისა და კულტურის საპარლამენტო კომიტეტის სხდომა გაიმართება, სადაც თავმჯდომარე, მარიამ ჯაში აუდიტორია 115-ის კანონპროექტს კომიტეტს გააცნობს. მხოლოდ ამის შემდეგ დაიწყებს მოძრაობა სამომავლო მოქმედებებზე მსჯელობას:

"5-ში არის პირველი შეხვედრა კანონპროექტთან დაკავშირებით და 5-ში გადავწყვეტთ რას ვიზამთ."

მანამდე კი, მე-6 კორპუსში საჯარო ლექციები გაიმართება.

უკვე ერთ კვირაზე მეტი გავიდა მას შემდეგ, რაც სტუდენტურმა მოძრაობამ, აუდიტორია 115, თბილისის სახელმწიფო უნივერსიტეტის თვითმმართველობის არჩევნების წინა დღეს, უნივერსიტეტის მე–6 კორპუსი დაიკავა და კარები შიგნიდან ჩაკეტა.