ბრიტანელი მომღერალი ვერა ლინი, რომელიც ცნობილია სიმღერით We'll Meet Again, 103 წლის ასაკში გარდაიცვალა. მისი ოჯახის წევრების განცხადებით, ის ხუთშაბათს დილით, ოჯახის წევრების გარემოცვაში, სასექსში მდებარე საკუთარ სახლში გარდაიცვალა.

ვერა ლინის სიმღერა, კვლავ შევხვდებით, მეორე მსოფლიო ომის დროს ჯარისკაცებისთვის იმედისა და გამძლეობის ჰიმნად იქცა ოპტიმისტური ტექსტის გამო.

თავად მომღერალი ომის დროს ეგვიპტეში, ინდოეთსა და მიანმარში ჩავიდა და ჯარისკაცებისთვის ცოცხლად იმღერა, რისთვისაც მას "შეიარაღებული ძალების სიყვარული" შეარქვეს.

"დღეს ჩვენი საყვარელი ვერა დავკარგეთ, მაგრამ ვიცით, რომ კვლავ შევხვდებით, მშვიდად განისვენე", — ასე გამოემშვიდობა დიდი ბრიტანეთის არმია მომღერალს ტვიტერიდან.

2020 წლის დასაწყისში, კორონავირუსის გამო გამოცხადებული კარანტინის დროს, დიდი ბრიტანეთის დედოფალმა ელისაბედმა მოქალაქეებს ვერა ლინის სიმღერა კიდევ ერთხელ შეახსენა, როდესაც თავისი მიმართვა "We will meet again" სიტყვებით დაასრულა.

ვერა ლინს ეძღვნება პინკ ფლოიდის 1979 წლის ალბომში, The Wall-ში შესული სიმღერა Vera. როჯერ უოტერსი 5 თვის იყო, როდესაც მისი მამა ომში დაიღუპა. სიმღერის ტექსტში სტრიქონი Vera, what has become of you? [ვერა, რა ბედი გეწია?] აღნიშნავს, რომ ვერაც, როგორც მისი დაპირება კვლავ შეხვედრაზე, გაუჩინარდა.

We'll Meet Again გამოყენებულია სტენლი კუბრიკის ფილმის, Dr. Strangelove-ის ფინალურ სცენაში.

გადაავლეთ თვალი წლების განმავლობაში ვერა ლინის მიერ შესრულებულ ცნობილ სიმღერას