უკრაინის პრეზიდენტი ვოლოდიმირ ზელენსკი თანმხლებ პირებთან ერთად ქალაქ ხმელნიცკში ადგილობრივ კაფეს ეწვია და ყავა მიირთვა. შესაძლოა, ამისთვის პრეზიდენტს ჯარიმა დაეკისროს.

ფოტოები 3 ივნისს თვითონ პრეზიდენტმა გაავრცელა და ამას დიდი გამოხმაურება მოჰყვა. პანდემიის დროს დაწესებული შეზღუდვებით, 5 ივნისამდე კაფეებსა და რესტორნებში კლიენტების მომსახურება მხოლოდ ღია სივრცეში შეიძლება.

ზელენსკისთან ერთად კაფეში სულ მცირე ხუთი ადამიანი იყო, მათ შორის ადმინისტრაციის ხელმძღვანელი და ქალაქის მერი. მათ დამცავი საშუალებები არ ეკეთათ.

"მაგარი ყავაა ხმელნიცკში! არომატული და გემრიელი! პირველი კაფეები უნდა გამოდიან კარანტინიდან, კორონავირუსული ეპიდემიის შემდეგ ნელ-ნელა გონს მოვდივართ", — წერს ზელენსკი.

შინაგან საქმეთა მინისტრის მოადგილის, ანტონ გერაშენკოს განცხადებით, პოლიცია პრეზიდენტისა და მისი თანხმლები პირების მხრიდან კარანტინის წესების სავარაუდო დარღვევას შეისწავლის. მისივე თქმით, საკარანტინო ღონისძიებების დარღვევისთვის ჯარიმა 17 ათასი გრივნაა (დაახლოებით 637 დოლარი).

"პოლიციას პრეზიდენტის დაჯარიმება პირველად არ უწევს. 2019 წელს, როცა ვოლოდიმირ ზელენსკიმ თავისი საარჩევნო ბიულეტენი აჩვენა, ის ხმის მიცემის საიდუმლოების გასაჯაროებისთვის დააჯარიმეს", — განაცხადა ანტონ გარაშენკომ.

როგორც მინისტრის მოადგილემ თქვა, დამნაშავეები არიან თუ არა პრეზიდენტი და მისი თანხმლები პირები, ეს კონტექსტის გათვალისწინებით უნდა დადგინდეს.